سکھر23 نومبر (اے پی پی ): سکھرمیں سندھ ہائی کورٹ کے احکامات پر ضلعی انتظامیہ کی جانب سے محکمہ ایریگیشن کی ایراضی پر سے قبضے ختم کرانے کے لیے پیر کے روز بھی آپریشن جاری رہا ۔ ضلعی انتظامیہ نے پہلے مرحلے میں محکمہ ایریگیشن کی زمینوں پر بنائی گئی کئی کمرشل عمارتوں کو گرانے کی تیاری مکمل کر لی ہے۔ اس سلسلے میں انتظامیہ نے ورکشاپ روڈ پر قائم دو نجی اسپتالوں کے خلاف کاروائی کرتے ہوئے سیل کردیا ہے، اسپتالوں کی انتظامیہ کو دو دن کے اندر زیر علاج مریضوں کو فوری طور پر دوسری جگہ منتقل کرنے کا نوٹس دے دیا ہے۔ محکمہ ایرگیشن کی زمینوں پر بنے گھر وں کے مکینوں نے بھی کسی بھی کا روائی سے بچنے کے لیے خود ہی اپنے آشیانوں کو خالی کرنا شروع کردیا ہے ، اپنا سامان گھروں سے باہر نکال کر منتقل کیا جا رہا ہے۔ انتظامیہ کی جانب سے آپریشن کے دوران کسی بھی ناخوشگوار واقعے سے نمٹنے کیلئے سکیورٹی کے سخت انتظامات کئے گئے ہیں۔
