حسن ابدال،20 نومبر (اے پی پی): ریجنل پولیس آفیسر راولپنڈی اشفاق احمد خان نے گردوارہ سری پنجہ کا دورہ کیا۔ اس موقع پرڈی پی او اٹک رانا شعیب محمودبھی موجودتھے جنہوں نے تمام سیکورٹی انتظامات پر تفصیلی بریفنگ دی۔آر پی او راولپنڈی نے گوردوارہ میں خصوصی طور پر قائم کنٹرول روم کا معائنہ کیا اور سکھ یاتری سردار کلیان سنگھ سے ملاقات بھی کی، سکھ یاتری نے اٹک پولیس کی جانب سے بہترین اور فول پروف سیکورٹی انتظامات پر اطمینان کا اظہار کرتے ہوئے آر پی او راولپنڈی اشفاق احمد خان کا شکریہ ادا کیا۔
ریجنل پولیس آفیسر راولپنڈی اشفاق احمد خان نے گوردوارہ انتظامیہ سے ملاقات کے دوران انہیں ضروری ہدایات بھی جاری کیں اور موقع پر موجود سینئر افسران و اہلکاروں کو ضروری ہدایات جاری کرتے ہوئے انہیں الرٹ رہنے اور سیکورٹی انتظامات کو یقینی بنانے کی تاکید کی۔
اس موقع پر آر پی او راولپنڈی کا کہنا تھا کہ عوام الناس کی بلاتفریق رنگ و نسل جان و مال کی حفاظت پنجاب پولیس کا وطیرہ ہے،پولیس فورس دن رات اپنے فریضہ کی احسن طریقہ سے ادائیگی کے لیے مصروف عمل ہے۔
