مری ،03 جنوری (اے پی پی):ضلع مری میں ڈپٹی کمیشنر مری احمد حسن رانجھا کی زیرنگرانی حسب معمول نئے سال کی پہلی کھلی کچہری کا انعقاد کیا گیا۔ کھلی کچہری میں ایڈیشنل ڈپٹی کمیشنرز، اسسٹنٹ کمیشنرمری سمیت زیلی محکموں کے افسران، ریونیو سٹاف نے حاضری دی۔اس موقع پر افسران نے شہریوں کی شکایات/مسائل سنے۔ سائلین سے تحریری درخواستیں لے کر موقع پر متعلقہ محکمہ جات کے افسران/آفیشلز کو ہدایات جاری کی گئیں کہ قانونی تقاضے پورے کرتے ہوئے میرٹ پر ان کی شکایات کا فوری ازالہ کیا جائے اور افسران بالا کو رپورٹ کی جائے ۔
ڈپٹی کمیشنر نے ذیلی اداروں کو متنبہ اورشہریوں کو واضح پیغام جاری کرتے ہوئے کہا کہ کھلی کچہری کے انعقاد کا مقصد شہریوں کو زیادہ سے زیادہ ریلیف اور بروقت انصاف کی فراہمی ہے،شہریوں کے اجتماعی و انفرادی حقیقی مسائل کے حل کیلئے میرے دفتر کے دروازے ہمہ وقت کھلے ہیں۔
