سیالکوٹ۔31مئی (اے پی پی):ڈپٹی کمشنر سیالکوٹ عدنان محمود اعوان نے سبلائم چوک فلائی اوور کے نیچے سپورٹس ارینا کا افتتاح کردیا ۔اس موقع ڈپٹی کمشنر عدنان محمود اعوان نے کہا کہ پلوں کے نیچے خالی جگہ پر سپورٹس ارینا بنانے کا مقصد نوجوان نسل کو مثبت سرگرمیوں کی جانب راغب کرنا اور معاشرے میں مثبت سرگرمیوں کو پروان چڑھانا ہے، ڈسٹرکٹ ایڈمنسٹریشن ، میونسپل کارپوریشن اور متعلقہ اداروں نے صرف ایک ماہ کی قلیل مدد میں فلائی اوور کے نیچے شاندار سپورٹس ارینا تعمیر کیا ہے جس پر پوری ٹیم مبارکباد کی مستحق ہے۔افتتاحی تقریب میں ڈائریکٹر کیپیٹل سپورٹس ڈاکٹر نعمان بٹ، ڈپٹی ڈائریکٹر ڈویلپمنٹ راجہ یاسر، ایم او فنانس رانا ثقلین، اسسٹنٹ ڈائریکٹر ٹیکنیکل محسن علی ریاض، ڈی ایس او افتخار گوندل سمیت کثیر تعداد میں نوجوان کھلاڑیوں نے شرکت کی۔انہوں نے کہا کہ یہ منصوبہ پبلک پرائیویٹ پارٹنرشپ کے تحت آگے بڑھایا جائے گا ، گورنمنٹ کی جانب سے سپورٹس کی سہولیات فراہم کر دی گئی ہیں اور اب ان کی دیکھ بھال اور کھیلوں کی سرگرمیوں کے فروغ کیلئے مقامی سپورٹس انڈسٹریز کے ساتھ معاہدہ کیا جارہا ہے۔ انہوں نے کہا کہ نوجوانوں کو ان کے گھروں کے قریب جہاں بھی جگہ دستیاب ہے وہاں اس طرح کے کھیلوں کی سہولیات فراہم کی جائیں گی جس سے نوجوان سپورٹس کی جانب متوجہ ہوں گے ،مقامی ٹیلنٹ کو صلاحیتوں کو سامنے لانے کا موقع ملے گا اور باصلاحیت کھلاڑیوں کی بھرپور حوصلہ افزائی کی جائے گی۔ ڈپٹی کمشنر نے کہا کہ ضلعی انتظامیہ کی جانب سے فٹبال، کراٹے، والی بال، ہاکی اور ٹیبل ٹینس چیمپئن شپ کا کامیاب انعقاد کیا گیا۔ اور یہ امر خوش آئند ہے کہ سیالکوٹ کے باصلاحیت کھلاڑی تمام کھیلوں میں ملکی اور بین الاقوامی سطح پر سیالکوٹ کی نمائندگی کرتے ہیں۔اس موقع ڈائریکٹر کیپٹل سپورٹس ڈاکٹر نعمان بٹ نے کہا کہ ڈپٹی کمشنر نے سپورٹس ارینا جیسے منفرد پراجیکٹ کی تکمیل سے شہر اقبال کے باسیوں کے دل جیت لیے ہیں، سپورٹس ارینا کے افتتاح سے مثبت سرگرمیاں کو فروغ ملے گااور نوجوان جو صرف سوشل میڈیا پر تمام توانائیاں صرف کر دیتے ہیں اور کی سپورٹس میں دلچسپی بڑھے گی جس پر وہ سول سوسائٹی کی جانب سے ڈپٹی کمشنر عدنان محمود اعوان اور ان کی ٹیم کے شکرگزار ہیں۔ انہوں نے امید ظاہر کی کہ حکومت پنجاب سیالکوٹ انتظامیہ کے اس ماڈل کا دائرہ کار صوبے بھر کے اضلاع میں بھی بڑھائے گی جس سے بڑے پیمانے پر کھیلوں کو فروغ ملے گا ۔
