ڈیرہ غازی خان،20اگست(اے پی پی): ڈپٹی کمشنر مہر شاہد زمان لک نے کہا ہے کہ ڈیرہ غازی خان میں کپاس کی فصل کی مجموعی صورتحال بہتر ہے، کاشتکاروں کی مناسب رہمنائی کی جائے۔
ان خیالات کا اظہار انہوں نے کپاس کی فصل کے حوالے سے جائزہ اجلاس کی صدارت کرتے ہوئے کیا۔اجلاس میں ایڈیشنل ڈپٹی کمشنر محمد اسد چانڈیہ،اسسٹنٹ کمشنر صدر عثمان غنی اور زراعت افسران نے شرکت کی۔
ڈپٹی کمشنر نے کپاس کھیتوں کے وزٹس اور ان پر کیڑوں و دیگر بیماریوں کے حملے کی رپورٹ لیتے ہوئے کہا کہ ضلع میں کپاس کی مجموعی صورتحال بہتر ہے اور کپاس کی فصل نازک مرحلہ میں داخل ہوچکی ہے،اس دوران محکموں کو مزید متحرک اور فعال کردار ادا کرنا ہوگا،فصل کو پانی اور معیاری زرعی ادویات کے حوالے سے ایڈوائزری جاری کی جائے۔انہوں نے کہا کہ ہر کھیت کے حوالے سے کاشتکار تک آگاہی ضروری ہے ،کپاس کی فصل کو سفید مکھی،گلابی سنڈی اور دیگر بیماریوں کے تدارک کےلئے مکمل آگاہی دی جائے۔
ڈپٹی کمشنر مہر شاہد زمان لک نے کہا کہ کپاس کی فصل کےلئے اگلے چند روز اہم ہیں۔انہوں نے کہا کہ کپاس کی پیداوار میں اضافہ کےلئے سب کو ملکر کام کرنا ہوگا۔انہوں نے کہا کہ محکمے ایک دوسرے پر ذمہ داریاں ایک دوسرے پر عائد کرنے کی روش ترک کریں،فرائض کی انجام دہی میں عدم دلچسپی برداشت نہیں کی جائے گی۔
