لاہور، 25 مارچ( اے پی پی ) : صوبائی وزیر پرائمری اینڈ سیکنڈری ہیلتھ کئیر خواجہ عمران نذیر کی قیادت میں ورلڈ ٹی بی ڈے واک کا انعقاد ڈائریکٹریٹ جنرل ہیلتھ سروسز میں کیا گیا۔صوبائی وزیر صحت خواجہ عمران نزیر نے ٹی بی کی آگہی کے سلسلہ میں غبارے چھوڑے ڈی جی ہیلتھ سروسز ڈاکٹر الیاس گوندل، ڈائریکٹر ٹی بی کنٹرول ڈاکٹر سہیل، ڈائریکٹر EPI ڈاکٹر مختار اعوان، ڈائریکٹر ہیڈ کوارٹر ڈاکٹر ریاض احمد، ایڈیشنل ڈائریکٹر ڈاکٹر اعظم، ڈاکٹر یداللہ بھی ہمراہ تھے۔صوبائی وزیر صحت خواجہ عمران نزیر نےاس موقع پر میڈیا سے گفتگو کرتے ہوئے کہا ٹی بی ایک موذی مرض ہے جسکے خاتمہ کے لئے مل کر کام کرنے کی ضرورت ہے،محکمہ صحت عوام کے تعاون سے ٹی بی مرض کے خاتمہ کے لئے پر عزم ہے ۔انہوں نے کہا کہ وزیر اعلی کا ویژن ہے کہ تمام مریضوں کو ادویات انکے گھر تک مفت پہنچائی جائیں، ایک ماہ کے اندر گھر تک میڈیسن کی مفت فراہمی کے لئے کورئیر سروس شروع کر رہے ہیں،گھر کی دہلیز تک مفت ادویات کی فراہمی کے لئے باقاعدہ پلاننگ کے تحت جلد میدان عمل میں آئے گی، خواجہ عمران نذیر نے کہا کہ ٹی بی، ہیپاٹائٹس جیسی امراض سے نجات دلانے کے لیے ہماری حکومت پر عزم ہے، قرب و جوار میں کسی مریض میں ٹی بی کی علامات ہوں تو وہ ہمارے مراکز صحت، ٹی بی کلینکس سے مفت علاج کرا سکتے ہیں، ٹی بی کے خاتمہ کے لئے تمام ہسپتالوں میں علاج معالجہ کی سہولیات فراہم کی جارہی ہیں۔
