اسلام آباد، 06 مئی (اے پی پی ): پاکستان نیشنل کونسل آف دی آرٹس میں ’’عزمِ مرصوص: نوجوان فنکاروں کی جانب سے معرکۂ حق کے ایک سال مکمل ہونے کی یاد میں‘‘ کے عنوان سے آرٹ نمائش کا افتتاح نیشنل آرٹ گیلری، اسلام آباد میں کر دیا گیا۔
نمائش کا افتتاح معروف خطاط اور پاکستان کے ثقافتی ورثے میں نمایاں خدمات انجام دینے والی شخصیت لیفٹیننٹ جنرل (ر) ہمایوں بنگش نے کیا۔ اس موقع پر وفاقی وزیر برائے نیشنل ہیریٹیج اینڈ کلچر ڈویژن، اورنگزیب خان کھچی اور ڈائریکٹر جنرل پی این سی اے محمد ایوب جمالی بھی موجود تھے۔ افتتاحی تقریب میں بڑی تعداد میں فنکاروں، طلبہ اور معزز مہمانوں نے شرکت کی۔
’’عزمِ مرصوص‘‘ نوجوان فنکاروں کی جانب سے ’’معرکۂ حق‘‘ کی روح کو کینوس پر منتقل کرنے کی ایک تخلیقی کوشش ہے، جہاں ملک بھر سے آئے ہوئے نوجوان مصور جرات، قربانی، اتحاد اور عوام و افواجِ پاکستان کے درمیان قائم لازوال رشتے کو اپنے فن کے ذریعے پیش کر رہے ہیں۔ نمائش میں پیش کیے گئے فن پارے محض ایک عسکری کامیابی کی یاد نہیں دلاتے بلکہ یہ ثقافتی تسلسل اور قومی عزم کا اظہار بھی ہیں۔ نوجوان فنکاروں کے یہ کام قومی یکجہتی، استقامت اور اجتماعی قوتِ ارادی کی بھرپور جھلک دکھاتے ہیں۔
وفاقی وزیر اورنگزیب خان کھچی نے نوجوانوں کی بھرپور شرکت کو سراہا اور امید ظاہر کی کہ آنے والے وقتوں میں بھی وہ ثقافتی سرگرمیوں میں ایسا ہی جذبہ برقرار رکھیں گے۔
لیفٹیننٹ جنرل (ر) ہمایوں بنگش نے اپنے خطاب میں کہا کہ یہ نمائش صرف ایک فن نہیں بلکہ ایک پُرعزم اور باوقار نسل کی آواز ہے۔ ان نوجوان فنکاروں نے رنگوں اور اشکال کے ذریعے وہ بات کہہ دی جو اکثر الفاظ سے بیان نہیں ہو پاتی۔ پاکستان سے ان کی محبت اور افواج سے ان کا احترام ان کے ہر فن پارے میں جھلکتا ہے۔
