اسلام آباد، 22 فروری (اے پی پی): وزیر اعظم عمران خان نے کہا ہے کہ ملک میں غریب اور مستحق افراد کی مدد و معاونت کے لیے مفصل پروگرام کا اعلان جلد کیا جائے گا۔
سرگودھا ڈویژن سے تعلق رکھنے والے ممبران قومی اسمبلی سے ملاقات میں وزیر اعظم عمران خان نے کہا کہ بیوروکریسی کو مکمل طور پر غیر سیاسی بنانا اور پبلک سروس ڈیلیوری کو یقینی بنانا حکومت کا منشور ہے۔وزیراعظم نے آگاہ کیا کہ نوجوانوں کو ہنر سیکھانا اور زراعت کی ترقی حکومت کی ترجیحات میں شامل ہیں۔
وزیراعظم نے ہدایت کی کہ عوامی نمائندے بدعنوانی ، رشوت خوری اور اقربا پروری میں ملوث عناصر کی نشاندہی کریں، سرکاری اہلکاروں کی جانب سے عوام کے لیے مشکلات پیدا کرنے کی روش کسی صورت بھی قابل قبول نہیں کی جائے گی ،افسران ،عوام کے لیے اوپن ڈور پالیسی پر من وعن عمل کو یقینی بنائیں۔
وزیر اعظم نے چوہدری عامر سلطان چیمہ کو مبارکباد دیتے ہوئے عوام کو درپیش مسائل کی نشاندہی اور انکے حل کو یقینی بنانے کے لیے متحرک کردار ادا کرنے کی ہدایت کی۔ منتخب نمائندگان کی جانب سے مظفر گڑھ ،میانوالی، شاہراہ اور سرگودھا میانوالی سڑک کا انتظام این ایچ اے کے حوالے کرنے کا مطالبہ بھی کیا گیا اور عوام کو درپیش مسائل سے وزیر اعظم کو آگاہ کیاگیا ۔
ملاقات میں سرگودھا ڈویژن میں پارٹی کے تنظیمی معاملات بھی زیر غور آئے۔
ملاقات میں ملک عمر اسلم خان، ملک محمد احسان اللہ ٹوانہ، امجد علی خان، ثنا اللہ مستی خیل، ڈاکٹر محمد افضل خان ڈھانڈلہ، چوہدری عامر سلطان چیمہ اور جویریہ ظفر آہیر ،معاون خصوصی نعیم الحق، ارشد داد اور ترجمان ندیم افضل گوندل بھی موجود تھے۔
اےپی پی/حمزہ/قرۃالعین
