اسلام آباد، 06 مئی (اے پی پی): وزیرِ اعظم عمران خان نے کہاہے کہ اسلامی تعلیمات، تاریخ و تمدن اور اسلامی معاشروں کے خصائل کو اجاگر کرنے میں ہمارے ذرائع ابلاغ کا کلیدی کردار ہے، کورونا ریلیف فنڈ کے حوالے سے پاکستانیوں کا جذبہ قابل تحسین ہے، انسانیت کی خدمت کا یہی جذبہ ہماری معاشرے کی اصل طاقت اور خوبی ہے ۔
وزیر اعظم نے ان خیالات کا اظہار بدھ کو سینیٹر فیصل جاوید سے ملاقات کے دوران کیا۔ ملاقات میں مسلم ممالک کے مابین تہذیب و ثقافت اور فنونِ لطیفہ کے شعبے میں تعاون کو فروغ دینے کے حوالے سے گفتگو کی گئی۔ ملاقات میں خصوصاً کورونا ریلیف فنڈ کے حوالے سے بھی گفتگو کی گئی ۔
موجودہ صورتحال پر بات کرتے ہوئے وزیراعظم نے کہا کہ ہمارا دین ہمیں دکھی اور مشکل میں گھری ہوئی انسانیت کی مدد کرنے کا درس دیتا ہے۔ انہوں نے کہا کہ پاکستانی خواہ دنیا کے کسی بھی کونے میں مقیم ہوں مشکل کی ہر گھڑی میں وہ اپنے اہلیان وطن کے شانہ بشانہ ہوتے ہیں۔
سینیٹر فیصل جاوید نے وزیر اعظم کو کورونا ریلیف فنڈ کے حوالے سے پاکستانیوں کے مثبت ردعمل کے حوالے سے آگاہ کیا۔
اے پی پی /ڈیسک/نورین
