اسلام آباد،10دسمبر(اے پی پی):وزیر خارجہ مخدوم شاہ محمود قریشی سےپاکستان کیلئے افغانستان کے نئے سفیر نجیب اللہ علی خیل نے جمعرات کو یہاں وزارت خارجہ میں ملاقات کی۔
دوران ملاقات وزیر اعظم کے دورہ ء کابل ، پاک افغان تعلقات اور افغانستان میں جاری امن عمل پر گفتگو ہوئی۔وزیر خارجہ نے پاکستان میں بطورِ افعان سفیر ذمہ داریاں سنبھالنے پر نجیب اللہ علی خیل کو مبارکباد دی ۔
مخدوم شاہ محمود قریشی نے کہا کہ پاکستان اور افغانستان کے مابین دیرینہ گہرے برادرانہ تعلقات ہیں، نائجر میں او آئی سی وزرائے خارجہ کونسل کے سنتالیسویں اجلاس کے موقع پر مجھے افعان ہم منصب سے ملاقات کا موقع ملا، جس دوران افغان وزیر خارجہ نے افعان امن عمل میں پاکستان کی کاوشوں کی تعریف کی۔ انہوں نے کہا کہ پاکستان، افغانستان میں قیام امن کو خطے کے امن و استحکام کیلئے ناگزیر سمجھتا ہے۔
وزیر خارجہ مخدوم شاہ محمود قریشی نے کہا کہ وزیر اعظم عمران خان کے دورہ ء کابل سے دونوں ممالک کے درمیان کثیر الجہتی شعبہ جات میں دو طرفہ تعاون کے فروغ کی راہیں ہموار ہوئی ہیں۔انہوں نے کہا کہ آج دنیا افغانستان میں قیام امن کیلئے پاکستان کی مصالحانہ کاوشوں کو سراہ رہی ہے، ہم افغانستان میں قیام امن کے ساتھ، افغان مہاجرین کی پر وقار اور باعزت وطن واپسی کے خواہاں ہیں۔
شاہ محمود قریشی نے کہا کہ دونوں ممالک کے درمیان تجارتی مراسم کے فروغ کیلئے ترجیحی تجارتی معاہدے پر مذاکرات کیلئے آمادگی اطمینان کا باعث ہے۔
افغان سفیر نجیب اللہ علی خیل نے وزیر خارجہ کا شکریہ ادا کرتے ہوئے پاک افغان تعلقات کے فروغ کیلئے اپنی بھرپور کاوشیں بروئے کار لانے کا یقین دلایا۔
