لاہور،11دسمبر(اے پی پی): گورنر پنجاب چوہدری محمدسرور سے وزیر اعلی سردار عثمان بزدار نے جمعہ کو یہاں ملاقات کی ہے ، جس دوران سیاسی اور حکومتی سمیت دیگر امور پربات چیت کی گئی۔ملاقات میں پی ڈی ایم کی انتشار پر مبنی سیاست کوہر صورت ناکام بنانے کے عزم کا اظہار کیا گیا اور امن وامان کو یقینی بنانے اور قانون ہاتھ میں لینے والوں کیخلاف بھرپور ایکشن کا فیصلہ کیا گیا۔ گورنراور وزیر اعلی نے اپوزیشن پرواضح کیا کہ الیکشن 2023میں ہی ہوں گے۔
چوہدری محمد سرور نے کہا کہ پی ڈی ایم کو عوام کی زندگیاں نہیں اپنی سیاست زیادہ عزیز ہے۔انہوں نے کہا کہ اپوزیشن کے استعفوں اور احتجاج سے حکومت کو کوئی خطر ہ نہیں ہے،کورونا میں شدت کے باوجوداپوزیشن کاجلسہ خطر ناک ہے۔
گورنر پنجاب چوہدری محمدسرور نے کہا ہے کہ وزیراعظم عمران خان کی قیادت میں ملک ترقی کر رہا ہے،ملک سے کرپشن کا خاتمہ حکومت کا مشن ہے، آئینی مدت سے حکومت ایک دن بھی پہلے کہیں جانیوالی نہیں ہے۔
سردار عثمان بزدار نے کہا کہ اپوزیشن کی سیاست ختم ہوچکی ہے عوام حکومت کیساتھ ہیں،پی ڈی ایم جتنے مرضی جلسے کر لے حکومت قائم رہے گی ۔انکا کہنا تھا کہ وزیراعظم عمران خان کی قیادت میں پاکستان آگے بڑھ رہا ہے ، ملک سے کر پشن کا خاتمہ تحریک انصاف کی حکومت کا مشن ہے ۔
