اسلام آباد،11دسمبر (اے پی پی): وزیرِ اعظم عمران خان نے کہا ہے کہ معاشی استحکام کے ثمرات کو جلد عام آدمی تک پہنچانے کیلئے ترجیحی بنیادوں پر اقدامات اٹھائے جائیں۔
ان خیالات کا اظہار وزیر اعظم عمران خان نے حکومتی معاشی ٹیم کے اجلاس کی صدارت کرتے ہوئے کیا ۔اجلاس میں وزیرِ اعظم کو ملک کی بہتر ہوتی ہوئی معاشی صورتحال پر تفصیلی بریفنگ بھی دی گئی۔
وزیرِ اعظم کو بتایا گیا کہ رواں مالی سال پرائمری بیلنس میں سرپلس، ایف بی آر کی محصولات میں 5 فی صد اضافہ، کرنٹ اکاؤنٹ سرپلس 1.2 ارب ڈالر، بیرونِ ملک سے ترسیلات میں 27 فی صد اضافہ، براہِ راست بیرونی سرمایہ کاری میں 9.1 فی صد اضافہ، اسٹیٹ بنک کے ذخائر 13.4 ارب ڈالر اور خاص طور پر بڑے پیمانے کی صنعت، آٹو انڈسٹری اور فرٹیلائیزر انڈسٹری کی پیداوار میں خاطر خواہ اضافہ ہوا ہے۔
اجلاس میں بتایا گیا کہ پاکستان کی سمارٹ لاک ڈاؤن پالیسی کی بدولت کرونا وائرس کی وبا کی پہلی لہر میں پاکستان کو باقی دنیا کی نسبت کم نقصان کا سامنا رہا جس کی پوری دنیا پذیرائی کر رہی ہے۔
اجلاس میں وفاقی وزیرِ خزانہ عبدالحفیظ شیخ، مشیران عبدالرزاق داؤد، ڈاکٹر عشرت حسین، معاونینِ خصوصی ندیم بابر اور وقار مسعود کے علاوہ متعلقہ اعلی افسران نے شرکت کی۔
