پشاور، 31مارچ(اے پی پی): خیبرپختونخوا بورڈ آف انویسٹمنٹ نے سرمایہ کاروں کو سہولیات دینے کےلئے انقلابی قدم، خیبرپختونخوا بورڈ آف انویسٹمنٹ میں کاروباری سہولت سیل کا افتتاح کر دیا گیا۔ اس موقع پر چیف ایگزیکٹو آفیسر خیبرپختونخوا بورڈ آف انویسٹمنٹ حسن داود بٹ نے کاروباری سہولت سیل پر تفصیل سے روشنی ڈالی اور اس کو صوبے کی معاشی ترقی میں ایک نیا سنگ میل قرار دیا، جس کی بدولت صوبے میں کاروباری سرگرمیوں میں خاطرخواہ اضافہ ہوگا اور ساتھ کراس بارڈر تجارت کو بھی فروغ دینے کےلیے مفید ثابت ہوگا۔
اس موقع پر منعقدہ تقریب سے خطاب میں وزیر اعلی خیبرپختونخوا کے معاون خصوصی برائے صنعت و تجارت عبدالکریم نے کہا ہے کہ خیبرپختونخوا بورڈ آف انویسٹمنٹ نے سرمایہ کاروں کو سہولیات دینے کےلئے انقلابی قدم اٹھایا ہے اور اس کےلئے وہ خراج تحسین کے مستحق ہیں، کاروباری سہولت سیل صوبے کی معاشی ترقی میں اہم کردار ادا کرے گا۔
معاون خصوصی نے کہا کہ میں خیبرپختونخوا بورڈ آف انویسٹمنٹ کے چیف ایگزیکٹو آفیسر حسن داود بٹ اور اس کی ٹیم کو کاروباری سہولت سیل قائم کرنے پرخراج تحسین پیش کرتاہوں اور یہ امید کرتا ہوں کہ یہ سیل صوبے میں معاشی ترقی اور کاروباری سرگرمیوں کے حوالے سے ایک نئے باب کا اضافہ ثابت ہوگا ، کیونکہ صوبائی حکومت صوبے کو سرمایہ کاروں کے لئے پسندیدہ اور نہایت موزوں خطہ بنائے کےلیے کوشاں ہے۔
انہوں نے کہا کہ اس سیل کو قائم کرنے میں ورلڈ بینک اور ERKF کے تعاون کا بے حد مشکور ہوں اور ساتھ خیبرپختونخوا انفارمیشن ٹیکنالوجی بورڈ کی تعاون سے خیبرپختونخوا سرکاری کاروباری پورٹل بھی قائم کیا گیا ہے جس کے ذریعے سرمایہ کار وفاقی اور صوبائی محکموں سے براہ راست اور ان لائن رابطہ کرسکتے ہیں۔
تقریب سے سیکرٹری صنعت و تجارت جاوید مروت کے ساتھ صوبائی وزیر خزانہ تیمور سلیم جھگڑا اور کنٹری ڈائریکٹر ورلڈ بینک نے ویڈیو لنک کے ذریعے خطاب کیا اور بورڈ آف انویسٹمنٹ خیبرپختونخوا کو کاروباری سہولت سیل قائم کرنے پر مبارکباد دی۔
