لاہور۔6مئی(اے پی پی):وزیراعظم عمران خان نے کہا ہے کہ نیا پاکستان ہائوسنگ پراجیکٹ میں وفاقی حکومت ہر ممکنہ تعاون کرے گی۔جمعرات کو وزیر اعظم کی زیر صدارت صوبہ پنجاب میں کم آمدنی والے طبقے کے لئے کم لاگت گھروں کی فراہمی کے منصوبوں پر پیشرفت کے حوالے سے اجلاس منعقد ہوا۔وزیر مملکت برائے اطلاعات فرخ حبیب، وزیر اعلی پنجاب سردار عثمان بزدار، صوبائی وزیر برائے ہاوسنگ میاں محمودالرشید، صوبائی وزیر برائے خزانہ مخدوم ہاشم جواں بخت، چیئرمین نیا پاکستان ہاوسنگ اینڈ ڈویلپمنٹ اتھارٹی لیفٹننٹ جنرل ( ر ) انور علی حیدر اور سینئر افسران اجلاس میں شریک تھے۔اجلاس میں پنجاب ہائوسنگ اینڈ ٹاؤن پلاننگ ایجنسی کو سبسڈیز، بینک فنانسنگ اور افرادی قوت کی فراہمی میں معاونت فراہم کرنے کے حوالے سے تجاویز پیش کی گئیں۔شرکاء کو عوام کی گھروں کی ضروریات،عید کے بعد بیلٹنگ کا آغاز اور گھروں کی تعمیر میں نجی شعبے کے اشتراک پر بھی تفصیلی بریفنگ دی گئی۔نجی شعبے کی گھروں کی تعمیر میں شرکت کے ضمن میں شرکاء کو آگاہ کیا گیا کہ صوبائی حکومت کی جانب سے ہاوسنگ رولز کی منظوری سے نجی شعبے کی گھروں کی تعمیر میں حوصلہ افزاء شرکت دیکھنے میں آ رہی ہے۔وزیراعظم عمران خان نے پنجاب ہائوسنگ اینڈ ٹاون پلاننگ ایجنسی کی جانب سے مجوزہ سائٹس کو سراہا۔وزیر اعظم نے کہاکہ نیا پاکستان ہائوسنگ پروگرام کے تحت وفاقی حکومت صوبہ پنجاب میں گھروں کی تعمیر کے منصوبوں میں بھرپور معاونت فراہم کرے گی۔
