لاہور ،18 جون(اے پی پی): گورنر پنجاب چوہدری محمد سرور اور وزیراعلیٰ پنجاب سردار عثمان بزدار کے دورمیان جمعہ کو یہاں گورنر ہاؤس میں ملاقات کی ہے ، ملاقات میں باہمی دلچسپی کے امور، سیاسی صورتحال اور نئے مالی سال کے بجٹ میں فلاح عامہ کے اقدامات سمیت کورونا کی صورتحال اور ویکسی نیشن کے عمل کے حوالے سے بات چیت کی گئی۔
گورنر پنجاب چوہدری محمد سرور نے صوبے کے عوام کیلئے بہترین بجٹ پیش کرنے پر وزیراعلیٰ عثمان بزدار کو مبارکباد دی اور وزیراعلیٰ عثمان بزدار نے آب پاک اتھارٹی کے تحت عوام کو صاف پانی کی فراہمی کیلئے گورنر پنجاب چوہدری محمد سرور کی کاوشوں کو سراہا۔
وزیر اعلیٰ عثمان بزدار کا کہنا تھا کہ اپوزیشن کی سازشی سیاست دم توڑ چکی، منفی سیاست کا مقابلہ عوامی خدمت سے کیا ہے اور کرتے رہیں گے، صوبے کے عوام کو ریلیف دینے کے اقدامات میں خلل برداشت نہیں کیا جائے گا، انتشار اور مایوسی پھیلانے والے عناصر کبھی کامیاب نہیں ہوں گے۔ انہوں نے کہا شوبازی کا دور گزر چکا، اب صرف عوام کی خدمت پر فوکس ہے، پنجاب حکومت نے تاریخ ساز سالانہ ترقیاتی پروگرام دیا ہے، پنجاب ترقی کے نئے دور میں داخل ہو چکا ہے اور ہر علاقے کیلئے یکساں فنڈز مختص کئے ہیں۔
اس موقع پر گورنر پنجاب چوہدری محمد سرور نے کہا کہ پنجاب حکومت نے عوام، صنعتکار، محنت کش، ملازم اور کسان دوست بجٹ پیش کرکے ہر طبقے کو ریلیف دیا ہے، ہر ضلع کیلئے علیحدہ ڈویلپمنٹ پیکیج پنجاب حکومت کا شاندار اقدام ہے، عوام کی خدمت ہمارا مشن ہے، اپوزیشن نے پہلے دن سے حکومت کے خلاف محاذ بنایا اور ہمیشہ ہزیمت اٹھائی، اپوزیشن جماعتوں کو ملک کے وسیع تر مفاد میں سوچنا اور عمل کرنا چاہیئے۔
