اسلام آباد۔31اگست (اے پی پی):وزیراعظم عمران خان نے کہا ہے کہ پاکستان کو غذائی پیداوار میں خود کفیل بنانا حکومت کی اولین ترجیح ہے۔ ان خیالات کا اظہار انہوں نے وفاقی وزیر برائے غذائی تحفظ سید فخر امام سے گفتگو کرتے ہوئے کیا جنہوں نے منگل کو یہاں ان سے ملاقات کی۔ ملاقات میں وزیرِ اعظم کو چاول، گنا، مکئی اور کپاس سمیت خریف کی فصلوں کی پیداوار میں متوقع اضافہ کے حوالے سے آگاہ کیا گیا اور انہیں لائیو سٹاک اور ماہی گیری کے شعبے میں وزارت کی طرف سے لائی جانے والی اصلاحات پر بھی بریفنگ دی گئی۔ وزیراعظم کو بتایا گیا کہ لائیو سٹاک کی جدید طریقے سے افزائش نسل، خوارک کی فراہمی اور صحت کی سہولیات میں بہتری لائی جا رہی ہے، پیداوار میں مزید اضافہ کیلئے تحقیقی اداروں میں اصلاحات متعارف کرائی جا رہی ہیں۔ وزیراعظم نے کہا کہ پاکستان کو غذائی پیداوار میں خود کفیل بنانا حکومت کی اولین ترجیح ہے، زرعی شعبے میں جدت لانے کیلئے حکومت ایگریکلچرل ٹرانفارمیشن پلان کے نفاذ کو یقینی بنا رہی ہے۔
