ملتان، 22ستمبر (اے پی پی ):ڈائریکٹر جنرل پنجاب ایمرجنسی سروس ریسکیو 1122ڈاکٹر رضوان نصیر کی ہدایت پردسواں نیشنل ریسکیوچیلنج کی تیاری کے سلسلہ میں ریجنل ایمرجنسی آفیسر ڈاکٹر اعجاز انجم کی زیر نگرانی چاروں اضلاع کے مابین ریسکیوچیلنج کا انعقاد کیا گیا جس میں ضلع وہاڑی،خانیوال، مظفرگڑھ اور ضلع ملتان کی ریسکیو ٹیموں نے حصہ لیا۔ ڈویژن ملتان میں چاروں اضلاع کے مابین ریسکیومقابلہ کروانے کا مقصد لاہور ہیڈ کواٹر میں منعقد ہونے والے دسواں نیشنل ریسکیو چیلنج کیلئے ڈویژن کی بہترین ٹیم کا انتخاب کرنا تھا،اس سلسلے میں فائر فٹ چیلنج، ٹراما چیلنج، بلند مقام سے ریسکیو کرنے کا چیلنج،گہرے کنوے سے ریسکیو چیلنج،واٹر سرچ آپریشن اینڈ ریسکیو چیلنجز شامل تھے۔ ڈویژن کی تمام ٹیموں نے مقابلہ جات میں ایک دوسرے کیلئے سخت حریف ثابت ہوئیں،انتہائی سخت مقابلوں کے بعد ریجنل ایمرجنسی آفیسر ڈاکٹر اعجاز انجم نے نتائج کا اعلان کرتے ہوئے کہا کہ ڈسٹرکٹ ملتان کی ٹیم نے پہلی پوزیشن جبکہ ڈسٹرکٹ وہاڑی کی ٹیم نے دوسری پوزیشن حاصل کی ہے۔
ڈسٹرکٹ ایمرجنسی آفیسر ڈاکٹر کلیم اللہ نے کہا کہ اللہ کا لاکھ لاکھ شکر ہے کہ ملتان ڈسٹرکٹ نے پہلی پوزیشن حاصل کی ۔ انہوں نے جیتنے والے ریسکیورز کو ان کی کامیابی پر مبارکباددیتے ہوئے کہا کہ یہ اللہ پا ک کاکرم، آپکی محنت اور توجہ کی بدولت آج ہمیں کامیابی نصیب ہوئی ہے آپ اسی طرح اپنے کام میں پیشہ وارنہ قابلیت کا مظاہر ہ کریں میں آپکی مزید کا میابیوں کیلئے دعاگوہوں ۔
آخر میں ریجنل ایمرجنسی آفیسر ڈاکٹر اعجاز انجم نے نیشنل ریسکیو چیلنج کیلئے ملتان کی ٹیم کوجیت کی مبارک باد د یتے ہوئے نیک خواہشات کا اظہار کیا اوراُمید ظاہر کی کہ انشاء اللہ ہم پُر امید ہیں کہ ہماری ٹیم لاہور میں ہونے والے آل پاکستان مقابلے میں فتح سے ہمکنار ہو کر ہمارے سرفخر سے بلند کرے گی اور اپنے ڈویژن کا نام روشن کرے گی۔
