بہاولنگر، 7 اکتوبر ( اے پی پی ): بہاولنگر تھانہ سٹی اے ڈویژن پولیس نے منشیات فروشوں کے خلاف کارروائی کرتے ہوئے بھاری مقدار میں شراب برآمد کر لی۔ایس ایچ او تھانہ سٹی اے ڈویژن بہاولنگرعبدالجبار کی سربراہی میں اسسٹنٹ سب انسپکٹررضوان عباس نے مخبر کی اطلاع پرکارروائی کرتے ہوئے بلدیہ روڈ بہاولنگر پر ذیشان ہو میوپیتھک سٹور کی آڑ میں شراب فروخت کرنے والے ملزم ذیشان احمدکو گرفتارکر لیا،ملزم کے قبضہ سے شراب کی 200 کُپیاں برآمد ہوئیں۔
سب انسپکٹر حسام اکرم نے مخبر کی اطلاع پر ریلوے کالونی میں کارروائی کرتے ہوئے محمد امیراسلم اورتسلیم بی بی کو ولائتی شراب فروخت کے لیے لے جاتے ہوئے گرفتار کر لیا، ملزمان کے قبضہ سے موقع پر 50بوتل ولائتی شراب برآمد ہوئی،ملزمان کو پابند سلاسل کر کے تفتیش کا عمل جاری ہے۔
اس موقع پر ڈی پی اوبہاولنگر محمد ظفر بزدار کا کہنا تھا کہ منشیات فروش نشے کی شکل میں ہماری نوجوان نسل کو زہر سپلائی کر رہے ہیں، ایسے عناصر کے خلاف بلاتفریق کارروائیاں جاری رہیں گی، عوام کوچاہیے کہ ایسے عناصر سے متعلق اطلاع دیکر پولیس کا ساتھ دیں۔
