ملتان، 06 نومبر (اے پی پی): وفاقی وزیر خارجہ شاہ محمود قریشی نے کہا ہے کہ حکومت کا تمام مشکلات کے باوجود ترقی کا بھرپور سفر جاری ہے ، عوام کی سہولت کیلئے انفراسٹرکچر کے منصوبوں کو ترجیح بنایا گیا ہے۔
ان خیالات کا اظہار وزیر خارجہ شاہ محمود قریشی نے ہفتہ کو یہاں ڈسٹرکٹ کوارڈینیشن کمیٹی کے اجلاس کی صدارت کرتے ہوئے کیا۔اجلاس میں ترقیاتی منصوبوں پر پیش رفت کا تفصیلی جائزہ لیا گیا ہے۔اجلاس کو ڈپٹی کمشنر عامر کریم خاں اور سی پی او منیر مسعود مارتھ نے بریفنگ دی۔
اجلاس سے خطاب میں وزیر خارجہ نے کہا کہ جنوبی پنجاب سیکرٹریٹ کے ثمرات ملنے کا آغاز ہوچکا ہے۔انہوں نے کہا کہ ٹریفک مسائل کے حل کیلئے ٹیکنکل اداروں سے سروے کرایا جائے گا۔ انہوں نے ہدایت کی کہا قومی تعمیر نو کے محکمے مقررہ وقت میں منصوبے مکمل کریں۔
اجلاس سے خطاب میں صوبائی وزیر توانائی ڈاکٹر اختر ملک نے کہا کہ وزیراعلیٰ پنجاب اس خطے کی ترقی کیلئے ذاتی دلچسپی رکھتے ہیں ، حکومت نے 3 برس میں ملتان کے میگا پراجیکٹس کی بنیاد رکھی ہے۔انہوں نے کہا کہ ٹمبر مارکیٹ،تغلق روڈ اور گراس منڈی فلائی اوورز کا فزیبلٹی پلان فوری بنایا جائے۔
پارلیمانی سیکرٹری ندیم قریشی نے کہا کہ ٹمبر مارکیٹ کو شہر سے منتقل کرنے کیلئے اقدامات کئے جائیں۔ انہوں نے کہا کہ روڈز کی مرمت اور کشادگی پر خصوصی فوکس کیا جائے۔
چیف وہپ ملک عامر ڈوگر نے کہا کہ عوامی مفاد میں اراکین اسمبلی کی سکیموں کی بروقت تکمیل ناگزیر ہے ۔انہوں نے کہا کہ حکومت نے عوامی مفاد کیلئے خطیر فنڈز فراہم کئے ہیں۔
ڈپٹی کمشنر عامر کریم خاں نے کہا اراکین اسمبلی کی تجاویز پر شہر کی خوبصورتی بڑھانے کیلئے عمل پیرا ہیں ۔انہوں نے کہا کہ تمام منصوبوں کو بروقت مکمل کرکے عوام کو ریلیف دینگے ۔ انہوں نے کہا کہ
والڈ سٹی اتھارٹی کے تحت مزارات کی اپ گریڈیشن شروع کرینگے۔
اجلاس میں اراکین اسمبلی کو ترقیاتی منصوبوں پر بریفننگ بھی دی گئی۔ اجلاس میں معاون خصوصی جاوید اختر انصاری شریک ہوئے ،ایم این اے ابرہیم خان اور احمد حسن ڈیہڑ ، اراکین اسمبلی قاسم عباس لنگاہ،محمد سلمان نعیم،سلیم اختر لابر،واصف مظہر راں،وسیم خاں بادوزئی، میاں طارق عبداللہ بھی موجود تھے۔
