لاہور، 2 جولائی ( اے پی پی ): وزیر اعلی پنجاب حمزہ شہباز شریف کی زیرصدارت اعلیٰ سطح کا اجلاس ہوا۔اجلاس میں عید الاضحٰی پر لاہور سمیت صوبہ بھر میں صفائی پلان کا تفصیلی جائزہ لیاگیا۔
اس موقع پر وزیر اعلیٰ پنجاب حمزہ شہباز کہا کہ مخلوق خدا کو صاف ماحول فراہم کرنا ہمارا فرض ہے، عوامی نمائندے بھی اپنے علاقوں میں صفائی کے انتظامات کی نگرانی کریں،صفائی پلان کی موثر مانیٹرنگ کا نظام وضع کیا جائے،صفائی پلان کے تحت کئے جانے والے تمام انتظامات کا تھرڈ پارٹی آڈٹ کرایا جائے، گنجان آبادیوں میں صفائی کے انتظامات پر خصوصی فوکس کیا جائے۔
وزیر اعلی حمزہ شہباز نے عید الاضحٰی پر بارش کے امکان کے پیش نظر واساز کو چوکس رہنے کی ہدایت کی اور یونین کونسل کی سطح پر عوامی نمائندوں کو صفائی کے عمل میں شریک کرنے اور کمیٹیاں تشکیل دینے کے ساتھ کمشنر لاہورڈویژن، ڈپٹی کمشنر لاہور سمیت دیگر اضلاع کے انتظامی افسران کو عید الاضحٰی پر فیلڈ میں موجود رہنے کی بھی ہدایت کی ۔انہوں نے صفائی کے انتظامات کی مانیٹرنگ کے لیے کنٹرول روم بنانے کا حکم دیا اور کہا کہ صفائی کے ساتھ نکاسی آب کے لئے موثر پلان مرتب کیا جائے بارشوں کے پیش نظر واساز اور متعلقہ ادارے اپنی تیاریاں مکمل رکھیں۔
وزیر علیٰ نے کہا کہ مویشی منڈیوں میں صفائی،نکاسی آب اور پارکنگ پر خصوصی توجہ دی جائے، الائشیں اٹھانے اور مناسب طریقے سے ٹھکانے لگانے کیلئے تمام ممکنہ وسائل بروئے لانے جائیں ، عیدالاضحی کے موقع پر پنجاب بھر میں صفائی کے بہترین انتظامات ہونے چاہئیں۔ انہوں نے کہا کہ آپ سب کی ذمہ داری ہے کہ صفائی کے انتظامات کو یقینی بنائیں پیش کردہ صفائی پلان پر حقیقی معنوں میں عملدرآمد یقینی بنایا جائے تاکہ شہریوں کو صفائی کی صورتحال میں واضح بہتری نظر آئے۔
وزیر اعلی کو بریفنگ کے دوران بتایا گیا کہ صفائی کے انتظامات کے لیے رواں برس عید الاضحٰی پر 1086 گاڑیاں فیلڈ میں ہوں گی گزشتہ برس 480 گاڑیاں فیلڈ میں تھیں الائشیں اٹھانے کے لئے3516 پک اپ کرائے پر لے رہے ہیں۔الائشیں اکٹھا کرنے کے لئے یونین کونسل کی سطح 280 کیمپ لگائے جائیں گے۔وزیر اعلی پنجاب حمزہ شہباز شریف نے عید الاضحٰی پر لاہور سمیت پنجاب کے شہروں میں صفائی کے بہترین انتظامات کے لئے ٹاسک سونپ دیئے ۔
کمشنر لاہورڈویژن اور چیف ایگزیکٹو آفیسر لاہور ویسٹ مینجمنٹ کمپنی نےعید الاضحٰی پر صفائی کے انتظامات کے بارے وزیر اعلی پنجاب حمزہ شہباز شریف کو بریفنگ دی۔ وزیر اعلی پنجاب حمزہ شہباز نے صفائی کے انتظامات کو بہتر بنانے کے بارے میں متعلقہ حکام کو ضروری ہدایات دیں ۔
خواجہ احمد حسان، چوہدری شہباز احمد، افتخار احمد، کبیر تاج، صبغت اللہ سلطان، غلام دستگیر، عمران گورایہ، سیکرٹری بلدیات، ایم ڈی واسا اور متعلقہ حکام نے اجلاس میں شرکت کی ۔
