سکھر،12اگست(اے پی پی):جشن آزادی کے سلسلے میں پاکستان میڈیا کونسل ضلع سکھر کے زیر اہتمام سندھ کے جنرل سیکریٹری حاجی محمد ریاض کھوکھر کی قیادت میں پاکستان زندہ آباد ریلی نکالی گئی جو شہر کے مختلف راستوں سے ہوتی ہوئی گھنٹہ گھر چوک پر اختتام پذیر ہوئی۔شرکاء ریلی نے ہاتھوں میں قومی پرچم تھام رکھے تھے جبکہ شرکاء کی جانب سے پاکستان زندہ آباد،پاک فوج زندہ آباد کے فلک شگاف نعرے لگائے گئے۔
شرکاء ریلی سے خطاب کے دوران رہنماؤں و سماجی شخصیات کا کہنا تھا کہ زندہ قومیں اپنا آزادی کا دن جوش و جذبے سے مناتی ہیں، 14 اکست 1947 ایک عظیم دن تھا جس کے ابھرتے ہوئے سورج نے دنیا کے نقشے پر ایک نئی اور عظیم اسلامی مملکت پاکستان کو وجود میں آتے دیکھا۔انہوں نے کہا کہ پاکستان اللہ کا ایک تحفہ اور اولیاء کا فیضان ہے۔
انہوں نے کہا کہ قوموں کی زندگی میں ان کی آزادی کے دن یادگار اور اہم ہوتے ہیں، ہم اپنے اسلاف کے نقش قدم پر چلتے ہوئے ذاتی مفادات کو قربان کرکے پاکستان کے مفادات کے لئے دن رات کام کریں تو ہم اپنا نام تاریخ میں سنہرے حروف میں لکھوا سکتے ہیں، ہماری پہچان پاکستان ہے۔
ریلی میں سکھر اسمال ٹریڈرز کے صدر حاجی محمد جاوید میمن،تنظیم پاکستانی کے سربراہ ڈاکٹر سعید اعوان،جمعیت علماء اسلام (س) کے مولانا عبد الستار بروھی سمیت دیگر ممبران اور شہریوں کی بڑی تعداد میں شرکت کی۔
