سیالکوٹ، 7 جنوری (اےپی پی ):ڈپٹی کمشنر عبداللہ خرم نیازی نے کہا ہے کہ ڈسکہ میں 1766 ملین روپے کی لاگت سے ترقیاتی منصوبوں پر کام کا آغاز رواں ماہ کر دیا جائے گا، حکومت پنجاب اور ورلڈ بینک کے اشتراک سے شروع ہونے والے اس منصوبے کے تحت شہر سے بارش کے پانی کے نکاس، اہم شاہراہوں کی تعمیر، سٹریٹ لائٹس کی تنصیب اور سالڈ ویسٹ مینجمنٹ کے لیے مشینری فراہم کی جائے گی۔
ان خیالات کا اظہار ڈپٹی کمشنر عبداللہ خرم نیازی نے ایک اہم اجلاس سے خطاب کرتے ہوئے کیا۔انہوں نے کہا کہ 933 ملین روپے کی لاگت سے بارش کے پانی کے نکاس کے لیے شہر کو 4 زون میں تقسیم کیا گیا ہے، منصوبہ کے تحت نئی ڈرینز کی تعمیر، پرانی ڈرینز کی بحالی کی جائے گی اور حسب ضرورت عارضی و مستقل پمپنگ اسٹیشن بھی بنائے جائیں گے ۔
انہوں نے بتایا کہ ڈسکہ میں سڑکوں کی تعمیر، چوراہوں کی خوبصورتی کے لیے 715 ملین روپے کی لاگت سے منصوبہ تیار کیا گیا ہے ، 192 ملین روپے لاگت سے سالڈ ویسٹ مینجمنٹ کے لیے مشینری کی خریداری ہو چکی ہے جبکہ سٹریٹ لائٹس کی تنصیب کے لیے بھی 107 ملین روپے رکھے گئے ہیں ۔
اے سی ڈسکہ اقبال سنگھیڑہ، چیف آفیسر میونسپل کمیٹی عبدالحئ بھٹی، ایکسیئن پبلک ہیلتھ ابرار احمد بھی اس موقع پراجلاس میں موجود تھے۔
