شرقپورشریف،12 فروری(اے پی پی):وفاقی وزیر تعلیم رانا تنویر حسین نے کہا ہے کہ عوامی خدمت مسلم لیگ ن کا دوسرا نام ہے، ملک وقوم کی خدمت کا مشن لیکر چلے تھے جو انشااللہ جاری رہے گا۔
ٹھٹہ رگواں میں کارپٹ روڈ کی تعمیر اور گیس فراہمی منصوبے پر کام کے آغاز کے موقع پر عوامی اجتماع سے خطاب کرتے ہوے وفاقی وزیر کا کہنا تھا کہ عمران خان کی فتنہ انگیزی اور شر انگیزی کی سیاست کو عوام مسترد کرچکی ہے ،آئندہ الیکشن میں عوام چار سال تک تباہی پھیلانے والوں کو مسترد کرکے عوامی خدمت اور ملکی خوشحالی کے لیے کام کرنے والوں کو آگے لیکر آئیں گے۔
رانا تنویر حسین کا کہنا تھا کہ خزانہ خالی ہونے کے باوجود عوامی فلاح و بہبود کے منصوبوں پر کام جاری ہے جو پایہ تکمیل تک پہنچائیں گے،خود آئین کی پاسداری کا درس دینے والے عمران خان کو یہ یاد ہونا چاہیے کہ چار سالوں میں جس طرح آئین کی دھجیاں اڑائی گئی اور اسمبلی سے افراتفری میں ایک ایک وقت میں 37،37قوانین پاس کرائے گئے اس وقت عمران خان کی اخلاقیات کہاں تھی اسے بس یہ یاد رکھنا چاہیے کہ آگے آگے دیکھو ہوتا ہے کیا۔
دریں اثنا وفاقی وزیر رانا تنویر حسین نے کارپٹ روڈ اور گیس فراہمی کے منصوبوں کی تختیوں کی نقاب کشائی کی۔
