لاہور، 8 جولائی(اے پی پی):- چیف سیکرٹری پنجاب زاہد اختر زمان کی زیر صدارت آج سول سیکرٹریٹ میں 4گھنٹے طویل اجلاس منعقدہوا،جس میں وزیر اعلی محسن نقوی کی ہدایت پر محرم الحرام کے دوران سکیورٹی پلان اور ممکنہ سیلاب سے نمٹنے کے انتظامات کو حتمی شکل دی گئی اور پنجاب میں فورتھ شیڈول میں شامل افراد کے خلاف کارروائی کا حکم دیا گیا اور فورتھ شیڈول میں شامل افراد کی نقل و حرکت پر پابندی عائد کردی گئی۔ وزیراعلی پنجاب محسن نقوی کی ہدایت پر پنجاب بھر میں شرپسندو ں کے خلاف انٹیلی جنس بیسڈ آپریشن کا فیصلہ کیا گیا اورسی ٹی ڈی کو انٹیلی جنس بیسڈ آپریشن کے لئے ہدایات جاری کر دی گئیں۔اجلاس میں پنجاب بھر میں سرچ اینڈ سویپ اور کومبنگ آپریشن کرنے کا فیصلہ کیا گیا۔ پنجاب بھر میں 280 ہاٹ سپاٹ کی کڑی نگرانی کی جائے گی۔آرپی اوز اور ڈی پی اوز کو محرم الحرام کے دوران قیام امن کے لئے ٹاسک دے دیا گیا اورامن کمیٹیوں کو فعال کرنے کا حکم دیا گیا۔ چیف سیکرٹری زاہد اختر زمان نے کہاکہ محرم الحرام میں قیام امن کے لئے تمام اداروں کو الرٹ کر دیا ہے -آئی جی پنجاب ڈاکٹر عثمان انور نے کہاکہ محرم الحرام کے دوران امن عامہ کے قیام کے لیے آخری حد تک جائیں گے۔ چیف سیکرٹری نے دریائے چناب اور اس سے منسلک ندی نالوں میں پانی کے بہاؤ کی مکمل مانیٹرنگ کا حکم دیتے ہوئے کہاکہ ممکنہ سیلاب سے نمٹنے کیلئے تمام ا نتظامات مکمل رکھے جائیں۔فلڈ ایمرجنسی پلان پر عملدرآمد انتظامیہ کی ذمہ داری ہے، غفلت برداشت نہیں۔انہوں نے ہدایت کی کہ بارشوں کے دوران تمام مشینری اورڈی واٹرنگ پمپس کو مکمل استعداد پر فعال رکھا جائے۔اجلاس میں انسپکٹر جنرل پولیس ڈاکٹر عثمان انور، سینئر ممبر بورڈ آف ریونیو، انٹیلی جنس اداروں، سی ٹی ڈی، سپیشل برانچ، سیکرٹری بلدیات اور متعلقہ حکام نے شرکت کی۔تمام ڈویژنل کمشنرز، آرپی اوز، ڈی پی اوز اور ڈپٹی کمشنرز ویڈیو لنک کے ذریعے اجلاس میں شریک ہوئے۔
