اسلام آباد،5اگست (اے پی پی):ایوان بالا کی قائمہ کمیٹی برائے ہوابازی نے وفاقی وزیر خواجہ سعدرفیق کی طرف سے پیش کردہ ” پاکستان انٹرنیشنل ایئر لائن کارپوریشن ترمیمی بل 2023 ” کا تفصیلی جائزہ لیتے ہوئے ترمیم کے ساتھ بل پر اتفاق کر لیا ہے ۔ یہ بل 4 اگست 2023 کو منعقدہ سینیٹ اجلاس میں وفاقی وزیر برائے ہوابازی خواجہ سعد رفیق نے پیش کیا تھا- قائمہ کمیٹی نے بل کا تفصیلی جائزہ لیا۔
قائمہ کمیٹی کا اجلاس چیئرمین کمیٹی سینیٹر ہدایت اللہ کی زیر صدارت پارلیمنٹ ہاؤس میں منعقد ہوا۔قائمہ کمیٹی کے اجلاس میں پاکستان انٹرنیشنل ایئر لائن کارپوریشن ترمیمی بل 2023 جو 4 اگست2023 کو منعقد ہونے والے سینیٹ اجلاس میں وفاقی وزیر برائے ایوی ایشن خواجہ سعد رفیق نے پیش کیا تھا کا تفصیل سے جائزہ لیا گیا۔
وفاقی وزیر برائے ایوی ایشن خواجہ سعد رفیق نے کہا کہ پاکستان انٹرنیشنل ایئر لائن کے مستقبل کو روشن بنانے کےلئے اقدامات اٹھا رہے ہیں اور یہ قانون سازی بھی اس لئے عمل میں لائی جا رہی ہے کہ نئی آنے والے منتخب حکومت کے لئے راستے آسان بنائے جا سکیں۔ وفاقی وزیر نے کہا کہ ایسی قانون سازی کی جائے جس سے اداروں کو درپیش مسائل اور رکاوٹیں دور ہو سکیں۔ اس قانون سازی سے پی آئی اے کے بیشتر مسائل حل ہو جائیں گے۔ قائمہ کمیٹی نے بل کا تفصیل سے جائزہ لیتے ہوئے ترمیم کے ساتھ بل پر اتفاق کر لیا۔
قائمہ کمیٹی کے اجلاس میں سینیٹرز سلیم مانڈوی والا، عمر فاروق اور ویڈیو لنک سے محسن عزیز کے علاوہ وفاقی وزیر ایوی ایشن خواجہ سعد رفیق، سیکرٹری وزارت ایوی ایشن، سی ای او پی آئی اے و دیگر حکام نے شرکت کی۔
