لاہور،18نومبر (اے پی پی):وزیراعلی ٰپنجاب محسن نقوی نے صوبائی کابینہ کے ہمراہ لاہور رنگ روڈ سدرن لوپ تھری پراجیکٹ کا دورہ کیا۔صوبائی وزرا عامر میر، اظفر علی ناصر، بلال افضل، ابراہیم حسن مراد اور صوبائی مشیر وہاب ریاض ہمراہ تھے۔
وزیر اعلیٰ محسن نقوی نے مراکہ سے بحریہ ٹان تک منصوبے پر ہونے والی پیشرفت کا جائزہ لیا اورمختلف مقامات پر منصوبے کے زیرتعمیر 3 برج پر جاری کاموں کا معائنہ کیا۔وزیر اعلی ٰمحسن نقوی نے ارتھ ورک اور پتھر ڈالنے کے کام کا بھی مشاہدہ کیا۔انہوں نے ہدایت کی کہ مراکہ انٹرچینج کو جتنا جلد ممکن ہو مکمل کیا جائے اور رنگ روڈ کے ساتھ سروس لین کی تعمیر کے کام کو بھی مقرر کردہ مدت میں مکمل کیا جائے۔
وزیر اعلی ٰمحسن نقوی نے چیئرمین لاہور رنگ روڈ اتھارٹی کو روزانہ پراجیکٹ کا وزٹ کرنے کی ہدایت کرتے ہوئے کہا کہ اضافی ورک فورس لگا کر کام کو تیز کیا جائے اور آنے والے دنوں میں دھند کے خدشے کے پیش نظر تعمیراتی کاموں کے لئے پیشگی پلاننگ کی جائے تاکہ کسی بھی سطح پر تاخیر نہ ہو۔ وزیر اعلیٰ محسن نقوی نے منصوبے کو ہر صورت جنوری تک مکمل کرنے کی ہدایت کی۔
