اسلام آباد / بیجنگ، 3 نومبر ( اے پی پی): چیئرمین وزیراعظم یوتھ پروگرام رانا مشہود احمد خان نے چین کا سرکاری دورہ مکمل کر لیا ہے۔ اس دوران انہوں نے پاکستان اور چین کے درمیان تعاون کے 11 معاہدوں پر دستخط کیے اور ان کی تقریبات میں شرکت کی، جبکہ 14 نمایاں اسکلز اور تعلیمی منصوبوں کی رونمائی کی یا ان کی تقریبات میں شریک ہوئے۔
27ویں چائنہ اینول کانفرنس اینڈ ایکسپو فار انٹرنیشنل ایجوکیشن (سی اے سی آئی ای 2026) میں تمام شراکت دار ممالک میں سب سے زیادہ معاہدے پاکستان کے ہوئے، جس سے پاکستانی نوجوانوں کے لیے بین الاقوامی اسناد اور روزگار کے مواقع کی راہ ہموار ہوئی ہے۔
گیارہ معاہدوں میں سے تین میں وزیراعظم یوتھ پروگرام فریق ہے، جو چائنہ گلوبل پروفیشنل اینڈ ٹیکنیکل سرٹیفکیشن سینٹر، جیلن الیکٹرانک انفارمیشن ووکیشنل اینڈ ٹیکنیکل کالج اور پیلی ووکیشنل کالج کے ساتھ طے پائے۔ باقی آٹھ معاہدے یونیورسٹی آف لاہور، غازی یونیورسٹی، نیوٹیک کراچی، پریسٹن انسٹیٹیوٹ آف مینجمنٹ سائنس اینڈ ٹیکنالوجی اور پنجاب ٹیوویٹا کو چین کے ووکیشنل کالجوں سے منسلک کرتے ہیں۔ یہ معاہدے میکاٹرونکس، گرین انرجی، موبائل کمیونیکیشنز، نرسنگ، جدید زراعت، کراس بارڈر ای کامرس اور بین الاقوامی اسکلز سرٹیفکیشن کے شعبوں پر محیط ہیں۔ بیجنگ میں قائم پی ایم وائی پی چائنہ سیکرٹریٹ ان کے رابطہ کار کے طور پر معاونت کرے گا۔
چودہ نمایاں منصوبوں میں انٹرنیشنل نرسنگ ٹیلنٹ ٹریننگ بیس، کراس بارڈر ای کامرس ٹیلنٹ ٹریننگ بیس (جس کی رونمائی چیئرمین نے کی)، پاکستان تیانگونگ کالج، جوائنٹ ٹیچر ٹریننگ سینٹر، اور انڈسٹریل روبوٹکس اور الیکٹرانک انفارمیشن انجینئرنگ کی نئی کمیٹیاں شامل ہیں۔
بیلٹ اینڈ روڈ انٹرنیشنل فورم آن انڈسٹری ایجوکیشن کوآپریشن سے خطاب کرتے ہوئے چیئرمین وزیراعظم یوتھ پروگرام رانا مشہود احمد خان نے صنعت کی ضروریات کے مطابق تربیت، مشترکہ تعلیمی پروگراموں، بین الاقوامی سرٹیفکیشن اور ووکیشنل اساتذہ کی تربیت پر زور دیا۔ انہوں نے چائنہ الیکٹرسٹی کونسل میں گرین انرجی ٹیلنٹ ایکسچینج پر بین الاقوامی سیمینار سے بھی خطاب کیا۔
سفیر پاکستان علی اسد گیلانی اور سفارتخانے کے سینئر حکام سے تعلیمی شراکت داریوں کے لیے سفارتی معاونت پر ملاقات کی، اور تھائی لینڈ کے او وی ای سی کے بیورو آف کوآپریشن کی ڈائریکٹر بینجاون پوکپونگ سے بیلٹ اینڈ روڈ شراکت دار ممالک کے درمیان تعاون پر بات چیت کی۔
