اسلام آباد، 22 فروری (اے پی پی ): ممتاز کشمیری رہنما اور چئیرمین سرمایہ کاری بورڈ سردار تنویر الیاس نے کہا ہے کہ عالمی برادری مقبوضہ کشمیر میں لاک ڈاوں ختم کرانے میں اپنا اہم کردا ر ادا کرے،آر ایس ایس نظریا ت کی حامل شدد پسند ہندوستانی حکومت دنیا کے امن کیلئے خطرہ بن گئی ہے ۔
سکاوٹ کے عالمی دن کے موقع پر اسلام آباد بوائز سکاوٹس ایسوسی ایشن کے زیر اہتمام اسلا م آباد کا لج فار بوائز ایف ایٹ میں خصوصی تقریب سے خطاب کرتے ہوئے انہوں نے کہا کہ کشمیر کی خصوصیت پر کیا گیا وار ،بابری مسجد کا فیصلہ اور شہریت کے بارے میں بھارتی اقدامات اس بات کی نشاندہی کرتے ہیں کہ ہندوستانی سیکولرازم صرف سیاسی ضروریات کو پورا کرنے کیلئے کیا گیا ڈھونگ ہے ۔
چئیرمین سرمایہ کاری بورڈ سردار تنویر الیاس نے کہا کہ بھارت جس طرح مقبوضہ کشمیر میں نہتے کشمیری عوام پر ظلم کر رہا ہے اس پر زیادہ دیر تک خاموش نہیں رہا جاسکتا اور خطہ کسی بڑی کشید گی سے دوچار ہو سکتا ہے ۔
صوبائی کمشنر اسلام آباد بوائز سکاوٹس ایسوسی ایشن حسنات احمد قریشی نے کہا کہ قومی ترقی اور تعمیر وطن میں ہمارے سکاوٹس بھی دوسروں کیساتھ برابر کے شریک ہیں ،انہوں نے عالمی سکاوٹ ڈے کو کشمیر کاز اور وزیر اعظم کے کلین اینڈ گرین مہم سے منسوب کرنے اور اسے پزیرائی بخشنے پر تعلیمی اور تد ریسی حلقوں کا شکریہ ادا کیا۔
تقریب میں مختلف تعلیمی اداروں کے طلبا و طالبات نے کشمیریوں سے یکجہتی میں ٹیبلوز، ملی نغمے اور تقاریر پیش کیں۔ آخر میں مہمان خصوصی سردار الیاس نے خوبصورت ایونٹ پر منتخب طلباوطالبات کیلئے دو لاکھ روپے انعام دینے کا بھی اعلان کیا اور پوزیشن ہولڈرز سکاوٹس میں میڈل ، اعزازات اور توصیفی سرٹیفیکیٹ پیش کئے ۔
سورس: وی این ایس، اسلام آباد
