اسلام آباد، 16 نومبر (اے پی پی ): وزیراعظم کے معاون خصوصی برائے صنعت و پیداوار تسنیم احمد قریشی نے بدھ کو یہاں انجینئرنگ ڈویلپمنٹ بورڈ کا دورہ کیا، اس دوران انہوں نے ادارہ کی کارکردگی کا تفصیلی جائزہ لیا۔ انجینئرنگ ڈویلپمنٹ بورڈ کے چیف ایگزیکٹو آفیسر نے بریفنگ دیتے ہوئے بتایا کہ ادارہ ملک کی صنعتی ترقی میں فعال کردار ادا کر رہا ہے ، کیونکہ صنعت ملکی معیشت میں ریڑھ کی ہڈی کی حیثیت رکھتی ہے اور صنعتی ترقی میں ای ڈی بی کا اہم کردار ہے ۔انہو ں نے معاون خصوصی کو ادارہ کی تفصیلی کارکردگی رپورٹ بھی پیش کی۔
وزیراعظم کے معاون خصوصی نے انجینئرنگ ڈویلپمنٹ بورڈ کو ہدایت کی کہ وہ کاروباری طبقے کو ملکی معیشت میں شامل کرنے کیلئے جامع حکمت عملی اور مربوط پالیسی بنائے اور ملک بھر میں چیمبر آف کامرس کے پلیٹ فارم سے اس سلسلے میں آگاہی مہم چلائی جائے تاکہ ملک بھر سے کاروباری طبقہ سسٹم میں شامل ہو اور ملکی معیشت کی ترقی اور صنعتوں کے فروغ کیلئے کاروباری طبقہ کو بھی شامل کیا جا سکے تاکہ حکومتی پالیسی سے عام کاروبار کرنے والے تاجر بھی مستفید ہو ں۔
