اقوام متحدہ، 12 نومبر (اے پی پی ): پاکستان نے یمن کی خودمختاری، آزادی، اتحاد اور علاقائی سالمیت کے لیے اپنی حمایت کا اعادہ کرتے ہوئے مملکتِ سعودی عرب کے خلاف حوثی دہشت گرد حملوں کی فوری اور غیر مشروط بندش کا مطالبہ کیا ہے۔
اقوام متحدہ کی سلامتی کونسل کی جانب سے قرارداد 2140 (2014) کے تحت عائد پابندیوں کی تجدید اور 2140 کمیٹی کی معاونت کرنے والے ماہرین کے پینل کے مینڈیٹ میں توسیع کی قرارداد منظور کیے جانے کے بعد، اقوام متحدہ میں پاکستان کے مستقل مندوب، سفیر سید حیدر شاہ نے قرارداد کا خیرمقدم کیا اور یمن میں امن، سلامتی اور استحکام کے فروغ کے لیے 2140 کمیٹی کے کردار کی اہمیت پر زور دیا۔
خطے کی سنگین سکیورٹی صورتِ حال کا ذکر کرتے ہوئے پاکستانی مندوب نے سعودی عرب کے خلاف حوثی دہشت گرد حملوں کی مسلسل کارروائیوں کی شدید ترین الفاظ میں مذمت کی۔ انہوں نے سعودی قیادت، حکومت اور برادر عوام کے ساتھ پاکستان کی مکمل اور غیر متزلزل یکجہتی کا اظہار کرتے ہوئے مملکت کی خودمختاری، علاقائی سالمیت، سلامتی اور استحکام کے لیے پاکستان کی غیر متزلزل حمایت کا اعادہ کیا۔
سفیر سید حیدر شاہ نے کہا کہ اقوام متحدہ کے منشور اور بین الاقوامی قانون کے مطابق سعودی عرب کو اپنی سرزمین کے دفاع اور اپنے شہریوں اور مقیم افراد کے تحفظ کا جائز حق حاصل ہے۔ انہوں نے حوثی حملوں کی فوری اور غیر مشروط بندش کا مطالبہ کیا۔
سفیر حیدر شاہ نے قرارداد کی تیاری اور مذاکرات کے دوران قلم بردار ملک کی حیثیت سے برطانیہ کی تعمیری کوششوں کو بھی سراہا۔ انہوں نے کہا کہ پاکستان نے قرارداد کے حق میں ووٹ دے کر 2140 کمیٹی کے کام کی اہمیت کو اجاگر کیا ہے۔ انہوں نے زور دیا کہ یمن کے امن، سلامتی اور استحکام کو نقصان پہنچانے والے افراد اور اداروں کو جوابدہ ٹھہرانا پائیدار امن کے قیام کے لیے ناگزیر ہے۔
یمن میں امن و استحکام کے لیے پاکستان کے عزم کا اعادہ کرتے ہوئے سفیر شاہ نے اقوام متحدہ کی زیرِ قیادت ایک جامع سیاسی عمل کو آگے بڑھانے کی اہمیت پر زور دیا، جو یمن کی اپنی قیادت میں اور یمنی عوام کی ملکیت ہو۔
انہوں نے یمن میں امن، استحکام اور سلامتی کی بحالی اور وہاں کے عوام کی سنگین انسانی مشکلات کے ازالے کے لیے تمام کوششوں کی حمایت جاری رکھنے کے پاکستان کے عزم کا اعادہ کیا۔











