پشاور، 11دسمبر(اے پی پی): وزیر اعلیٰ کے مشیر برائے جیل خانہ جات تاج محمد خان نے کہا ہے کہ صوبائی حکومت صوبے کے تمام اضلاع کے جیلوں میں قیدیوں کو جدید سہولیات کی فراہمی کے لیے ٹھوس اقدامات اٹھا رہی ہے۔
ان خیالات کا اظہار انہوں نے سنٹرل جیل پشاور میں خواتین قیدیوں کو مقامی تاجر اختر حمید کی طرف سے کپڑے، تکیہ اور دوسر ے سردی سے بچانے والی سامان کی فراہمی کےموقع پر کیا۔ اس موقع پر انسپکٹر جنرل جیل خانہ جات مسعود الرحمن بھی موجود تھے۔ جنہوں نے معاون خصوصی برائے جیل خانہ جات اور تاجر اختر حمید کا شکریہ ادا کیا اور اس امر کا اظہار کیا کہ اس سے جیل میں قید خواتین کو سردی سے بچنے میں مدد ملے گی۔
معاون خصوصی نے جیل میں قید خواتین کو صاف ستھرے اور معیاری کھانے پینے کے سہولیات کی فراہمی کو یقینی بنانے کی ہدایت کی۔ اس موقع پر معاون خصوصی نے دوسرے مخیر حضرات سے بھی اپیل کی کہ وہ متعلقہ جیلوں میں اپنی عطیات کے زریعے ان قیدیوں کو سہولیات فراہم کرنے میں حکومت کا ساتھ دیں۔
انہوں نے متعلقہ اہلکاروں کو ہدایات دیتے ہوئے کہا کہ قیدیوں کو کرونا وائرس سے بچانے کے لیے خصوصی اقدامات اٹھائے جائیں اور احتیاطی تدابیر کو مدنظر رکھ کر اقدامات کیے جائیں جبکہ اسی سلسلے میں وبا کے دوران قیدیوں سے ملاقات پر پابندی عائد کر دی گئی ہے۔
اس موقع پر انسپکٹر جنرل جیل خانہ جات نے بھی معروف تاجر اختر حمید کی اس کاوش کو شاندار الفاظ میں خراج تحسین پیش کیا اور اس امید کا اظہار کیا کہ یہ سامان خواتین کی مشکلات میں کمی لانے میں معاون ثابت ہوگا۔
