لاہور19جنوری (اے پی پی ): صوبائی وزیر تعلیم پنجاب ڈاکٹر مراد راس کا لاہور میں معاون خصوصی برائے وزیر اعلی پنجاب ڈاکٹر فردوس عاشق اعوان کے ہمراہ اہم پریس کانفرنس سے خطاب کرتے ہوئے کہنا تھا کہ گزشتہ ایک سال کے دوران کرونا وائرس کی بدولت ہمارے بچوں کا بہت تعلیمی نقصان ہوا اور سکول ایجوکیشن ڈیپارٹمنٹ پنجاب کی جانب سے اس نقصان کا ہر ممکن ازالہ کرنے کی بھرپور کاوشیں کی گئیں ہیں۔ سکول ایجوکیشن پنجاب کی جانب سے ایکسیلریٹد لرننگ پروگرام کے تحت کم وقت کی بدولت طلبا کی سہولت کے لئے تعلیمی نصاب میں کمی کی گئی۔ ڈاکٹر مراد راس نے کہا کہ گزشتہ سال طلبا کو بغیر امتحانات پروموٹ کیا گیا مگر اس سال ایسا کچھ نہیں ہوگا۔ طلبا کو چھٹیوں کے دوران دئیے جانے والے کام کے نمبر 50 فیصد ہوں گے اور بقیہ 50 فیصد نمبروں کے لئے امتخانات لئے جائیں گے۔ صوبائی وزیر تعلیم نے بتایا کہ گزشتہ ایک سال کے دوران طلبا کے لئے تعلیمی لخاظ سے جانچ پڑتال کے نظام میں اصلاحات کی گئیں ہیں اور حالات کو مدمظر رکھتے ہوئے وہ فیصلے بروئے کار لائے گئے جن کا اثر فوری اور کار آمد ہو۔ کرونا وائرس کی بدولت دی جانے والی تعطیلات کے دوران تعلیمی نقصان کو کم سے کم کرنے کے لئے کیبل چینل تعلیم گھر کا متعارف کرایا گیا جس سے لاکھوں طلبا مستفید ہوئے۔ ڈاکٹر مراد راس نے یہ بھی کہا کہ کرونا وائرس کی بدولت سکولوں کی بندش کے پہلے مرحلے میں والدین کو سکول فیس میں 20 فیصد کی رعایت دی گئی۔
وزیر تعلیم پنجاب ڈاکٹر مراد راس کا مزید کہنا تھا کہ کرونا وائرس کی بدولت درپیش حالات کے دوران ہی ہنجاب کابینہ کی جانب سے سنگل نیشنل کریکولم کی منظوری دی گئی اور اب اس پر کام جاری ہے۔ نجی سکولوں کی آن لائن رجسٹریشن کے لیے پہلی بار کوئی سسٹم متعارف کروایا گیا جس کے تحت اب تک ہزاروں نجی سکول آن لائن رجسٹریشن کروا کے لائیسنس حاصل کر چکے ہیں۔ ڈاکٹر مراد راس کا یہ بھی کہنا تھا کہ تاریخ میں پہلی بار اساتذہ کی آن لائن ٹریننگ کا انعقاد کیا گیا اور حال ہی میں چھوٹے بچوں کی ابتدائی تعلیم کے لئے ارلی چائلڈ ہڈ ایجوکیشن سے متعلقہ کتابیں پنجاب بھر کے پرائمری سکولوں میں بلکل مفت تقسیم کی گئیں۔ صوبائی وزیر تعلیم پنجاب نے مزید بتایا کہ کرونا وائرس کے پھیلاو کی بدولت ہونے والی سکولوں کی بندش کے دوران بچوں کی ڈراپ آوٹ شرح میں اضافہ ہوا ہے اور یکم فروری سے طلبا کی سکولوں میں واپسی کے لیے ایک بڑی مہم کا آغاز کیا جا رہا ہے جو کہ مرکزی سطح پر چلائی جائے گی۔ انہوں نے یہ بھی بتایا کہ طلبا اور والدین کو درپیش نجی اکیڈمیوں کے حوالے مسائل کو مستقل بنیادوں پر حل کرنے کے لئے آن لائن انصاف اکیڈمی متعارف کروانے جا رہے ہیں جس پر کام بہت جلد مکمل کر لیا جائے گا۔ آخر میں سیاسی لخاظ سے بات کرتے ہوئے ڈاکٹر مراد راس نے کہا کہ پی ڈی ایم پاکستان ڈاکو موومنٹ ہے، یہ صرف اور صرف ذاتی مفادات کی جنگ لڑ رہے ہیں۔وزیر اعظم عمران خان نے بہت سال پہلے بتا دیا تھا کہ جب ان پر ہاتھ ڈالا جائے گا تو یہ سب چور اکٹھے ہوجائیں گے۔
