لاہور ، 29اپریل(اے پی پی): وفاقی وزیر ریلوے خواجہ سعد رفیق نے کہا ہے کہ غدار سازی کی فیکٹریاں بند ہونی چاہیے،جب سے یہ مافیا اقتدار میں آیا انہوں نے لوگوں کا جینا حرام کیا ہوا ہے۔
جمعہ کو یہاں میڈیا سے گفتگو کرتے ہوئے سعد رفیق نے کہا کہ ہمارے خلاف کوئی کیس ثابت نہیں ہوسکا، شیخ رشید نے دھاندلی سے اپنے بھتیجے کو ایم این اے بنوایا، رانا ثناء اللّٰہ ٹھیک کہتے تھے، یہ پنڈی کا شیطان ہے، آج میں بھی کہتا ہوں کہ یہ پنڈی کا شیطان ہے۔انہوں نے کہا کہ یہ اپوزیشن میں ہو تو پارلیمنٹ کا گھیراؤ کر لیتا ہے، حکومت میں ہو تو انتقامی کارروائیاں کرتا ہے، آئین توڑنے والا غدار ہوتا ہے، تم آرٹیکل 6 کے مجرم ہو، فتنہ عمرانیہ ملک میں تقسیم در تقسیم کررہا ہے، تم جتنی بدتمیزی کرو گے اتنا ہی جواب دیا جائے گا۔
سعد رفیق نے کہا کہ ہم نے کوئی چوری کی ہے تو ثبوت لے کر آؤ، ساڑھے تین سال میں تم ایک بھی ثبوت نہیں لا سکے، اگلے دن ایک سابق چیف جسٹس ان سے مل رہے تھے، یہ دونوں سازش کے کردار ہیں، ابھی اور کردار سامنے آئیں گے۔انہوں نے کہا کہ پاکستانی فوج غیرجانبدار ہے تو انہیں تکلیف شروع ہو جاتی ہے، اس کی غلط فہمی ہے کہ اس کا بیانیہ بک رہا ہے۔
وفاقی وزیر سعد رفیق نے کہا کہ میں نیب کو نہیں مانتا، کس پر کونسا کیس چل رہا ہے نہیں معلوم، عمران خان کی حمایت کرنے والوں کے لیےکل کا واقعہ لمحہ فکریہ ہے۔انہوں نے کہا کہ عمران خان کی سزا یہ ہے کہ آنے والے الیکشن میں اسے شکست فاش ہو، عمران خان کے اپنے ارکان اور اتحادیوں نے انہیں چھوڑ دیا، عمران خان اپنے سہولت کاروں کیساتھ 12 سال کا منصوبہ بنا کر آئے تھے۔
