اٹک،05 اگست (اے پی پی): یوم استحصال کشمیر کے حوالے سے تقریب اور واک کا اہتمام کیا گیا جس کے مہمان خصوصی ایڈیشنل ڈپٹی کمشنر جنرل اٹک ذوالفقار احمد تھے۔تقریب میں سی ای او ایجوکیشن اٹک ملک فتح خان، ڈی ای او سکینڈری اکرم ضیاء، ایکساٸز اینڈ ٹیکسیشن آفیسر ، جنرل سیکرٹری فورتھ پلر ضلع اٹک نثار علی خان سمیت مختلف شعبہ زندگی سے تعلق رکھنے والے افراد اورطلباء وطالبات نے شر کت کی ۔
کشمیری عوام کے ساتھ اظہار یکجہتی کے لیے ضلع کونسل سے کچہری چوک تک واک کا اہتمام بھی کیا گیا۔ریلی کے شر کاء نے ہاتھوں میں پلے کارڈز اور بینرز اٹھا رکھے تھے جن پر کشمیری عوام کے حق میں نعرے درج تھے۔ صبح نوبجے سائرن بجا یا گیا اور ایک منٹ کی خامو شی اختیار کی گئی۔
تقریب سے خطاب کرتے ہوئے ایڈیشنل ڈپٹی کمشنر جنرل اٹک ذوالفقار احمد نے کہا کہ 05 اگست2019 کو بھارت نے ظالمانہ قوانین نافذ کرتے ہوئے مقبو ضہ کشمیر کی خصوصی حیثیت کا خاتمہ کر دیا اور ان پر ظلم وستم کے پہاڑتوڑنا شروع کر دیئے۔ آزادی کشمیریوں کابنیادی حق ہے جو انہیں ہر صورت ملنا چائیے۔کشمیریوں کو آزادی نہ دے کر انکا بنیادی حق پا مال کیا جا رہا ہے جو انتہائی زیادتی ہے۔انہوں نے کہا کہ بھارتی حکومت نے کشمیریوں کے حقوق پامال کرتے ہوئے گذشتہ دو سال سے ان کی آزادی سلب کی ہوئی ہے اور ہمارے کشمیری بھائی انتہائی مشکل زندگی بسر کر نے پر مجبور ہیں۔ ضرورت اس امر کی ہے کہ اقوام عالم کشمیریوں کے ساتھ کھڑے ہوں اور بھارت کو مجبور کریں کہ وہ کشمیریوں کے حق خود ارادیت کا احترام کرے اور انہیں ان کی مرضی کے مطابق فیصلہ کرنے کا اختیار دے۔
ایڈیشنل ڈپٹی کمشنر جنرل اٹک ذوالفقار احمد نے کہا کہ کشمیری عوام ڈوگرہ راج کے وقت سے آزادی کے لیےء کو شاں ہیں اور آج بھارت ان پر ظلم وستم ڈھا کر ان کی آواز کو دبانا چاہتا ہے جو ممکن نہیں ہے۔ پاکستانی عوام بھر پور انداز میں کشمیری عوام کا مقدمہ لڑ رہے ہیں جس سے بھارت سفار تی معاذ پر تنہا رہ گیا ہے۔انہوں نے کہا کہ ظلم وستم کے ذریعے کشمیریوں کے حق خود ارادیت اور آزادی کی آواز کو نہیں دبایا جا سکتا۔
انہوں نے کہا کہ پاکستان کی حکومت اور پاکستان کی عوام کشمیریوں کی اخلاقی اور سفارتی حمایت جاری رکھیں گے۔اب وقت آگیا ہے کہ کشمیر کا مسئلہ اقوام متحدہ کی قراردادوں اور کشمیری عوام کی امنگوں کے مطابق حل کیا جائے،جس کا ان سے وعدہ کیا گیا ہے اور بھارت کو مجبور کیا جائے کہ وہ اپنی ریاستی دہشت گردی بند کرے اور کشمیری عوام کو اپنے مستقبل کا فیصلہ خود کرنے کا اختیار دے۔انہوں نے کہا کہ وہ دن دور نہیں جب کشمیری عوام کو بھارت کے ناجائز تسلط سے آزادی حاصل ہوگی اور وہ آزاد فضاء میں سانس لیں گے اور آزاد زندگی بسر کریں گے۔ ہمیں چاہیے کہ ہم اپنی صفوں میں اتحاد پیدا کر یں اور اپنی معیشت کے ساتھ اپنے کردار کو بھی مضبوط بنائیں۔
تقریب سے خطاب کر تے ہوئے دیگر مقررین نے کہا کہ کشمیر کی جنگ بیانیہ کی جنگ ہے اور آج پاکستان کی عوام اس جنگ میں کامیاب ہو ئی ہے۔اب کشمیر کی جنگ 22 کروڑ عوام لڑ رہے ہیں اور یہ جنگ آخری سانس تک جاری رہے گی۔ مقررین نے خطاب کر تے ہوئے کشمیریوں کے حق خود ارادیت کی بھر پو ر حمایت کا اعلان کیا۔
تقریب میں طلباء کی بڑی تعداد نے بھی شرکت کی انہوں نے ہاتھوں میں پلے کارڈز اور بینرز اٹھا رکھے تھے جن پر کشمیر کی آزادی کے نعرے درج تھے۔
یوم استحصال کشمیر کے حوالے سے واک ضلع کونسل ہال سے شروع ہو کر کچہری چوک پر اختتام پذیر ہوئی۔واک کے دوران شرکاء نے کشمیر کی آزادی کے حق میں نعرے لگائے اور کشمیریوں سے بھر پور یکجہتی کا اظہار کیا۔ واک کے دوران مختلف شعبہء زندگی سے تعلق رکھنے والے افراد نے کشمیر یوں کی حق خود ارادیت اور بھارت کے ظلم وستم پر پُر جوش نعرے لگاۓ۔
اٹک میں یوم استحصال کشمیر کے حوالے سے ضلع اٹک کی تمام تحصیلوں میں ریلیز اور تقریبات کا انعقاد کیا گیا جس میں عوام نے کشمیری عوام کے ساتھ بھر پور یکجہتی کا اظہار کیا۔
