لاہور،10فروری(اے پی پی):نگران وزیراعلیٰ پنجاب محسن نقوی نے جمعہ کو ایکسپو سنٹرمیں پنجاب فوڈ اتھارٹی کے فوڈ ایکسپو 2023 کا افتتاح کیا۔ محسن نقوی نے فوڈ ایکسپو میں لگائے سٹالز کا معائنہ کیا۔ نگران وزیراعلیٰ نے پنجاب سمال انڈسٹریز کارپوریشن کے دستکاریوں کے سٹال کا بھی دورہ کیا اور سٹالز میں موجود اشیا اور دستکاریوں میں گہری دلچسپی کا اظہار کیا۔
نگران وزیراعلیٰ نے کہا کہ پنجاب فوڈ اتھارٹی نے بہترین انداز میں فوڈ ایکسپو کا اہتمام کیا ہے۔فوڈ ایکسپو کے ذریعے مقامی اور بین الاقوامی فوڈ بزنس کو فروغ دیا جا رہا ہے۔ فوڈ ایکسپو شہریوں کیلئے ہے،شہری فوڈ ایکسپو آ کر تفریح کے مواقع سے فائدہ اٹھائیں۔انہوں نے کہا کہ معیاری خوراک سے متعلق آگاہی فوڈ اتھارٹی کا بہترین اقدام ہے۔ فوڈ ایکسپو میں 77 سٹال لگائے گئے ہیں۔ فوڈ کانفرنس میں ملکی اور غیر ملکی کمپنیوں کے سربراہان شرکت کریں گے۔ فوڈ ایکسپو میں مشاعرہ، میوزیکل کنسرٹ اور بچوں کیلئے پپٹ شو ہوں گے۔
ڈی جی پنجاب فوڈ اتھارٹی نے نگران وزیراعلی کو فوڈ ایکسپو کے بارے میں بریفنگ دی۔ کوریا کے سفیر سوئسنگ پاو،صوبائی وزیر تعمیرات و مواصلات و خوراک بلال افضل، صوبائی وزیر اطلاعات و ثقافت عامر میر، لاہور قلندر کے چیف ایگزیکٹو آفیسر عاطف رانا، معروف صنعتکار شیخ عرفان اقبال، سیکرٹری فوڈ، سی سی پی او لاہور، کمشنر لاہور ڈویژن، ڈپٹی کمشنر لاہور اور دیگر حکام بھی اس موقع پر موجود تھے۔
