ہرنائی ،01 مارچ (اے پی پی ): قائم مقام ڈپٹی کمشنر ارباب سعید علی کاسی نے کہاہےکہ حکومت بلوچستان،سیکنڈری تعلیم نے صوبے میں تعلیم عام کرنے کےلیے متعدد اقدامات اٹھائیں ہیں،تعلیم کے بغیر کوئی قوم ترقی کی منازل طے نہیں کرسکتی ،تعلیم ہی قوموں کی خوشحالی ترقی کی ضامن ہے ۔
ان خیالات کا اظہار انہوں نے ڈپٹی کمشنر کمپلیکس میں داخلہ مہم کے حوالے سے پریس کانفرنس سے خطاب کرتے ہوئے کیا۔انہوں نے کہاکہ علم کےزیور سے ہمارےمعاشرے کی نئی نسل کو آراستہ کرنا سب سےاچھا اقدام ہے، بچے مستقبل کے معمار ہے،رواں سال داخلہ مہم کے دوران ہمارا ہدف 1185 بچوں کو سکول میں داخل کروانا ہے۔انہوں نے کہاکہ اساتذہ کرام محنت سے علم کی روشنی بچوں میں منتقل کریں،سکول سے باہر بچوں کیلئے گھر گھر مہم چلایا جائیگا تاکہ کوئی بھی بچہ سکول سے باہر نہ رہے۔
اس موقع پر ڈسٹرکٹ ایجوکیشن آفسر مومن خان ترین،ڈسٹرکٹ آفیسر ایجوکیشن حیدر خان ترین ڈسٹرکٹ ہیلتھ آفیسر ڈاکٹر فیاض احمد مستوئی، ایم ایس ڈاکٹر مظفر علی، ڈی ڈی او ای شایرگ زاہد شاہ مشوانی، ایکسین ملک نیاز احمد، ایس ڈی او پی ایچ ای سید عابد شاہ، ڈی ایس ایم داود کاکڑ،بھی موجود تھے۔
