صوبے بھر کی طرح ملتان میں بھی پنجاب کلچرل ڈے بھرپور طریقے سے منایا گیا

ملتان 14 مارچ (اے پی پی ): صوبے بھر کی طرح ملتان میں بھی پنجاب کلچرل ڈے بھرپور طریقے سے منایا گیا۔اس سلسلے میں آرٹس کونسل ملتان میں رنگا رنگ تقریب کا انعقاد کیا گیا۔جس میں افسران و سول سوسائٹی کی بڑی تعداد موجود تھی۔اس موقع پر گفتگو کرتے ہوئے رجسٹرار حبیب الرحمٰن نے کہا کہ پنجاب تصوف اور محبت کی سرزمین ہے۔اس کا کلچرل ذرخیز اور خوبصورت ہے۔ ڈائیریکٹر آرٹس کونسل سلیم قیصر  نے کہا کہ پنجاب کلچر ڈے دراصل دنیا کو اور نسل نو کو اپنی ثقافت سے روشناس کروانے کا عمل ہے۔پنجاب جتنی خوبصورت دھرتی اتنی ہی خوبصورت ثقافت ہے۔ ڈپٹی ڈائریکٹر انفارمیشن ارم سلیمی نے کہا کہ آج کا دن پنجاب کا دن ہے، پنجاب کی ذرخیز ثقافت کا دن ہے۔حکومت پنجاب نے سرکاری سطح پر پنجاب کلچر ڈے منانے کا حکم دیا۔ اسسٹنٹ ڈائریکٹر آرٹس کونسل زاہد اقبال نے کہا ہے کہ ثقافت سلامت رہے تو قومیں مضبوط رہتی ہیں۔ اس موقع پر سکولوں کے طلباء و طالبات نے ثقافتی خاکے و رقص پیش کیا۔