ملتان، 19 مئی(اے پی پی ): کمشنر عامر خٹک نے کہا ہے کہ ملک کی ترقی کیلئے ہم سب کو اپنا مثبت کردار ادا کرنا ہوگا، وطن عزیز کی سلامتی و بقا سب سے اہم ہے۔
ان خیالات کا اظہار انہوں نے ایمرسن یونیورسٹی کے طلبا و طالبات کے وفد سے گفتگو میں کیا۔ کمشنر ملتان ڈویژن انجینئر عامر خٹک نے کہا کہ نسل نو ہمارے ملک کا اثاثہ ہیں،پاکستان کو اللہ تعالیٰ تا قیامت قائم و دائم رکھے،پاکستان کو ماحولیاتی تبدیلی کا سامنا ہے، نوجوان نسل اپنے حصے کا درخت لگائے، اس کی آبیاری کرے اور دوسروں کو بھی درخت لگانے اور پانی کا ضیاء روکنے بارے تلقین کرے۔ انہوں نے مزید کہا کہ شہر کی تعمیر و ترقی، انفراسٹرکچر کی بہتری کیلئے اقدامات کئے جارہے ہیں،شہریوں کے مسائل ترجیحی بنیادوں پر حل کئے جائیں گے۔سوئی گیس، پی ٹی سی ایل واسا کو سڑک کی تعمیر کے بعد بحالی کا ٹاسک سونپا ہے۔انہوں نے کہا کہ سکولوں میں100،واساکے65 اور کارپوریشن کے56 واٹر فلٹریشن پلانٹس فعال ہیں،شہر کے تمام 50 پارکوں میں بہترین انتظامات کئے جارہے ہیں،تجاوزات کے خاتمے کیلئے سب کو اپنا کردار ادا کرنا ہوگا۔
کمشنر عامر خٹک سے طلباء و طالبات نے سوالات کئے۔ایڈیشنل کمشنر سرفراز احمد، اسسٹنٹ کمشنر جنرل ارشد وٹو ، ڈپٹی ڈائریکٹر ارم سلیمی، ہیڈ آف ڈیپارٹمنٹ آفتاب خان خاکوانی، انٹرنشپ کواڈینیٹر ڈاکٹر عمارہ عمر خاکوانی اور دیگر افسران بھی موجود تھے۔
