کوئٹہ،21 مئی(اے پی پی): 34نیشنل گیمز کے پہلے مرحلے کے آخری ایونٹ میں مردوں کے فٹ بال کا فائنل 12سال بعد پولیس نے جیت کر گولڈ میڈل اپنے نام کر لیا ہے جبکہ خواتین فٹ بال کا فائنل آرمی نے جیتا۔پولیس اور آرمی نے گولڈ، واپڈا اورائیر فورس نے سلور، ایچ ای سی اور بلوچستان نے کانسی کا تمغہ جیت لیا۔
کوئٹہ میں جاری 34ویں نیشنل گیمز کے پہلے مرحلے کے آخر ی ایونٹ میں مردوں کے فٹ بال ایونٹ کے سلسلے کا فائنل پولیس اور ائیر فورس کے درمیان کھیلا گیا جو ایک سخت مقابلے کے بعد پولیس نےتین گول سے فائنل جیت کر گولڈ اپنے نام کر لیا۔ پولیس نے یہ اعزاز 12سال بعد حاصل کیا، ائیر فورس سلور کے ساتھ دوسرے اوربلوچستان نے کانسی کا میڈل جیت کر تیسرے نمبر پر رہا۔ اسٹیڈیم میں تماشائیوں کی بڑی تعداد نے دونوں ٹیموں کے کھلاڑیوں کی بھرپور حوصلہ افزائی کی۔
قبل ازیں ایونٹ کے سلسلے میں تیسری پوزیشن کیلئے بلوچستان اور آرمی کے درمیان میچ کھیلا گیا جو انتہائی سخت رہا اور مقررہ وقت تک برابر رہا، میچ کو فیصلہ کن بنانے کیلئے پانچ پانچ پلینٹی کک دئیے گئے۔ آرمی کے کھلاڑیوں نے دو پلیٹنی مس کر دی، بلوچستان نے تین مقابلے میں چار گول کر کے کانسی کا تمغہ جیت لیا ۔
خواتین کا فائنل میچ آرمی اور واپڈا کے درمیان کھیلا گیا، واپڈا کی ٹیم نے آرمی کے گول پوسٹ پر حملے کرتے ہوئے 18ویں منٹ میں دو گول کر دئیے، آرمی کی ٹیم نے بہترین کھیل کا مظاہرہ کرتے ہوئے یکے بعد دیگر دو گول کر کے میچ برابر کر دیا۔ دوسرے ہاف میں بھی آرمی ٹیم نے واپڈا کی ٹیم پر دبائو جاری رکھتے ہوئے مزید دو گول کر کے فائنل جیت کر گولڈ اپنے نام کر لیا ،واپڈا سلور کے ساتھ دو سری اور ایچ ای سی نے کانسی کا تمغہ حاصل کر کے تیسری پوزیشن حاصل کی۔
قبل ازیں تیسری پوریشن کے سلسلے میں ایچ ای سی اورپولیس کے درمیان میچ کھیلا گیا جو ایچ ای سی نے یکطرفہ مقابلے کے بعد صفر کے مقابلے میں تین گول سے جیت لیا۔کھلاڑیوں ڈھول کی تھاپ پر خوب رقص کرتے ہوئے خوشیاں منائی ۔
