اسلام آباد,13اکتوبر (اے پی پی):نگراں وفاقی وزیر برائے نجکاری فواد حسن فواد سے پاکستان میں فرانس کے سفیر نکولس گیلے نے ان کے دفتر میں ملاقات کی اورپائیدار دوطرفہ تعلقات کے حوالے سے مختلف امور پر تبادلہ خیال کیا ، بات چیت کا مقصد تعلیم، زراعت اور وسیع تر اقتصادی تعاون سمیت ضروری شعبوں میں تعاون بڑھانا ہے۔ سفیر گیلے نے پاکستان کی نجکاری کی حکمت عملی کے بارے جاننےمیں گہری دلچسپی کا اظہار کیا۔ اس حوالے سے وفاقی وزیر فواد حسن فواد نے انہیں نجکاری پلان کا جامع جائزہ پیش کیا۔ فرانسیسی سفیر نے فرانسیسی مشاورتی خدمات اور ممکنہ فرموں اور کارپوریشنوں کے بارے میں قیمتی تجاویز پیش کیں جو ممکنہ طور پر ان اقدامات میں حصہ لے سکتی ہیں۔ گفتگو کے دوران وفاقی وزیر فواد حسن فواد نے ڈسٹری بیوشن کمپنیوں (ڈسکوز) کی نجکاری کی حکمت عملی پر بھی روشنی ڈالی۔ انہوں نے ڈسکوز کی نجکاری کے لیے ایک مرحلہ وار طریقہ کار کی تفصیل دی، جس کا ڈھانچہ رعایتی ماڈل پر ہے۔ افتتاحی مرحلے میں مینجمنٹ کنٹرول کی منتقلی حصص کی خریداری کے ساتھ یا اس کے بغیر عمل میں لائی جائے گی۔ دوسرے مرحلے میں مقررہ بینچ مارکس حاصل ہونے کے بعد اضافی حصص کی عوامی پیشکش شامل ہوگی۔ سفیر گیلی نے مختلف شعبوں میں تعاون اور سرمایہ کاری میں شامل ہونے کی فرانس کی مضبوط خواہش کا اظہار کیا۔ انہوں نے ان ایریاز پر روشنی ڈالی جہاں فرانسیسی کاروباری اداروں نے پہلے ہی خاص طور پر آٹوموٹیو اور ریٹیل کے شعبوں میں نمایاں پیش رفت کی ہے۔ ملاقات میں پاکستان اور فرانس کی اپنی سٹریٹجک شراکت داری کو تیز کرنے اور اقتصادی اور ثقافتی تبادلے کے لیے نئی راہیں تلاش کرنے کے لیے غیر متزلزل لگن کا بھی اظہار کیا گیا۔
