لاہور، 6اپریل(اے پی پی): وزیراعلیٰ پنجاب مریم نواز شریف کی ہدایت پر وزیر خوراک بلال یاسین نے ٹیموں کے ہمراہ صوبہ بھر میں علی الصبح چھاپے مارے اور ہفتہ کے روز کو ایکشن ڈے ڈکلئیر کر دیا۔ بلال یاسین نے لاہور ٹولنٹن مارکیٹ میں 600 بیمار اور کم وزن مرغیاں تلف کروائیں اور قانون کے مطابق بھاری جرمانے عائد کیے۔ انھوں نے پنجاب کے شہریوں کو کھلائے جانے والے گوشت کی مکمل ٹریسیبیلٹی کیلئے جدید لائحہ عمل تیار کیا۔
وزیر خوراک پنجاب نے کہا کہ سٹور کیے گئے نان ٹریس ایبل زائد المیعاد گوشت کو تلف کروایا جا رہا ہے، وزیراعلیٰ کی ہدایت پر صوبہ بھر میں ٹیموں کو متحرک کیا اور دن کا آغاز بھرپور ایکشن کیا گیا، بلال یاسین نے کہا کہ ماہ مبارک میں جعلسازی کا مکروہ دھندہ کرنے والوں کیخلاف زیرو ٹالرینس پالیسی کا نفاذ کیا گیا ہے۔ انھوں نے کہا کہ زیادہ منافع کی لالچ میں بیماریاں فروخت کرنے والے عوام دشمنوں کو کاروبار کی ہرگز اجازت نہیں دیں گے۔ پنجاب بھر کی میٹ سیفٹی ٹیموں کو جدید لائحہ عمل کے تحت ٹاسک تفویض کیے جاچکے، عید الفطر پر چیکنگ جاری رہے گی۔
لاہور ٹولنٹن مارکیٹ دورے کے موقع پر ڈی جی فوڈ اتھارٹی اور متعلقہ حکام بھی وزیر خوراک کے ہمراہ تھے۔ صوبائی وزیر خوراک نے کہا کہ رمضان المبارک کے دوران پنجاب بھر میں 4 ہزار 165 میٹ شاپس، گودام اور گوشت بردار گاڑیوں کی چیکنگ کی جس میں سے 20 شاپس اور گودام سیل کیے، 14 مقدمات درج جبکہ 51 لاکھ 24 ہزار کے جرمانے عائد کیے۔
بلال یاسین نے کہا کہ ماہ مبارک میں فوڈ سیفٹی ٹیموں نے 47 ہزار318 کلو غیر معیاری مضر صحت گوشت تلف کیا۔ ماہ رمضان کے دوران ٹولنٹن مارکیٹ میں 375 شاپس کی چیکنگ، 6 لاکھ 52 ہزار کے جرمانے، 9 ہزار 800 کلو ناقص گوشت تلف کیا۔
وزیر خوراک پنجاب نے بتایا کہ علی الصبح گوشت بردار گاڑیوں، میٹ شاپس اور ٹولنٹن مارکیٹ کی چیکنگ کے دوران 9 لاکھ 56 ہزار کلو گوشت اور مرغیوں کی چیکنگ کی اور مضر صحت گوشت فروخت کرنے والے 14 گودام اور شاپس مالکان کیخلاف مقدمات درج کروائے گئے۔
