حب،28 اپریل(اے پی پی):پاکستان کوسٹ گارڈز کے زیرِ اہتمام لسبیلہ ہنگلاج ماتا نانی مندر کے مقام پر ہندو برادری کیلئے فری میڈیکل کیمپ کا انعقاد کیا گیا۔ جس میں پاکستان کوسٹ گارڈز کے ڈاکٹرز بشمول لیڈی ڈاکٹرز اور طبی عملے کی جانب سے قائم 2 روزہ فری میڈیکل کیمپ میں مریضوں کوطبی سہولتیں فراہم کی گئیں۔
دو روز تک جاری رہنے والے اس میڈیکل کیمپ میں کل 2656 مریضوں کا چیک اپ کیا گیا جن میں مرد خواتین اور بچے شامل تھے تمام مریضوں کو مفت ادویات بھی فراہم کی گئیں۔
ھندو برادری نے خاص طور پر لگائے گئے اس کیمپ کے لیے پاکستان کوسٹ گارڈز اور طبی عملے کی اس کاوش اور جذبے کوبے حد سراہتے ہوئے ان کا شکریہ ادا کیا۔
پاکستان کوسٹ گارڈز کی جانب سے ماضی کی روایات کو برقرار رکھتے ہوئے ڈاکٹروں کی مدد سے مستقبل میں بھی شہر سے دور افتادہ اور طبی سہولتوں سے محروم علاقوں خصوصاً ہنگلاج ماتا نانی مندر جیسے مقامات اور مذہبی تہوار کے موقع پر میڈیکل کیمپس کا انعقاد کیا جاتا رہے گا۔
