لاہور،02 جولائی ( اے پی پی ): وزیراعلیٰ پنجاب مریم نواز شریف کی زیر صدارت خصوصی اجلاس منعقد ہوا ۔وزیر اعلیٰ کو پنجاب انفورسمنٹ ریگولیٹری اتھارٹی کے مجوزہ سٹرکچر کے بارے میں تفصیلی بریفنگ دی گئی ۔
اجلاس میں انفورسمنٹ اتھارٹی کے قیام کے لیے مجوزہ قوانین، رولز میں ترمیم کا جائزہ لیا گیا ۔وزیر اعلیٰ مریم نوازشریف نے انفورسمنٹ ریگولیٹری اتھارٹی کے قیام کے لئے قانونی کارروائی جلد از جلد مکمل کرنے کا حکم دیا اور انفورسمنٹ اتھارٹی کی مانیٹرنگ کا فول پروف میکانزم تشکیل دینے کی ہدایت دی۔
وزیراعلیٰ کو بریفنگ کے دوران بتایا گیا کہ صوبائی سطح پر پنجاب انفورسمنٹ ریگولیٹری اتھارٹی قائم ہوگی ہر ضلع میں ڈسٹرکٹ انفورسمنٹ ریگولیٹری بورڈ بنے گا۔ تحصیل کی سطح پر سب ڈویژنل انفورسمنٹ آفیسر قانون کے نفاذ کو یقینی بنائے گا ہیرنگ آفیسر تحصیل کی سطح پر اپیل سن کر فیصلہ دے گا۔
بریفنگ میں بتایا گیا کہ پنجاب انفورسمنٹ ریگولیٹری اتھارٹی مہنگائی کے خاتمے کے لئے موثر کردار ادا کرے گی۔ تحصیل میں انفورسمنٹ افسر سمیت 40 اہلکار اشیائے صرف کے نرخ کی مانیٹرنگ اور کارروائی کریں گے۔عوام کی شکایات پر بھی گرانفروشوں کے خلاف موثر کارروائی ممکن ہوگی۔تحصیل کی سطح پر چار ایپلٹ فورم پر فیصلے کے لئے ٹائم لائن مقرر ہوگی۔ بریفنگ میں مزید بتایا گیا کہ مووایبل تجاوزات کو ہٹا کر گلیاں بازار وسیع کیے جائیں گے۔ غیر منقولہ تجاوزات کے مستقل خاتمے کے لئے تحصیل انفورسمنٹ آفیسر کارروائی جاری رکھے گا۔ 200سال کے بعد انتظامی نظام میں عوامی مفادات کے تحت تبدیلی لائی جارہی ہے۔ پی ای آر اے میں ارکان اسمبلی،ڈی جی، انتظامی سیکرٹری اور4 آزاد ارکان شامل ہونگےڈسٹرکٹ کی سطح پر ڈپٹی کمشنر ڈسٹرکٹ انفورسمنٹ ریگولیٹری بورڈ کے سربراہ ہونگے۔ تحصیل کی سطح پر انفورسمنٹ افسر کارروائیوں اور مانیٹرنگ کے ذمہ دار ہونگے۔ انفورسمنٹ آفیسرز کو ایک ماہ کی خصوصی ٹریننگ بھی دی جائے گی۔انفورسمنٹ اتھارٹی کی کارکردگی کا ماہانہ جائزے کا سسٹم بھی وضع کیا جائے گا۔ تجاوزات ہٹانے پر ہونے والے اخراجات بھی قانون کی خلاف ورزی کرنے والوں سے وصول کیے جائیں گے۔
اجلاس سے گفتگو کرتے ہوئے وزیر اعلیٰ پنجاب نے کہا کہ عوام کو مہنگائی سے نجات دلانے کا عزم غیر متزلزل ہے۔ذخیرہ اندوزی کرنے والوں کو عوام کے مفادات سے کھیلنے کی اجازت نہیں دی جا سکتی۔ سینیٹرپرویز رشید، سینئر منسٹر مریم اورنگزیب، چیف سیکرٹری، ایڈیشنل چیف سیکرٹری، سیکرٹری فنانس، سیکرٹری آئی اینڈ سی اور دیگر حکام بھی موجود تھے۔
