لاہور،20 جون (اے پی پی): نگران وزیراعلیٰ پنجاب محسن نقوی کی زیر صدارت خصوصی اجلاس منعقد ہوا جس میں نگران وزیر اعلیٰ پنجاب نے بڑے ہسپتالوں میں ہیلتھ کیئر کی بہتری کے لئے پلان طلب کر لیا۔
سیکرٹری صحت کوہیلتھ کیئرسروسز کی فراہمی کے لئے 7روز کے اندر پلان پیش کرنے کی ہدایت دیتے ہوئے نگران وزیراعلیٰ پنجاب نے کہا کہ ہسپتالوں میں ضروری سہولتو ں کی فراہمی اور تعمیر ومرمت کا جامع پلان بنایا جائے گا۔ انہوں نے کہا کہ خدمات کی بہتری کے لئے ہسپتالو ں کوپرانی عمارتوں سے نئی بلڈنگز میں منتقل کیاجائے گا۔ بڑے ہسپتالوں میں بائیومیڈیکل مشینیں، طبی آلات اور دیگر سہولتیں فراہم کی جائیں گی ۔
اجلاس میں بڑے ہسپتالوں کے لئے ہیلتھ کونسلز کے قیام کی تجویز پر اتفاق کیا گیا ۔ اجلاس کو بتایا گیا کہ پنجاب کے 7بڑے ٹیچنگ ہسپتالو ں میں 60بنیادی سٹینڈرڈ میڈیسن فراہم کی جائیں گی اور تمام کارڈیالوجی ہسپتالوں میں 25ضروری میڈیسن فراہم کی جائیں گی۔
چیئرمین پلاننگ اینڈ ڈویلپمنٹ بورڈ، سیکرٹری خزانہ، سیکرٹری ہیلتھ،سیکرٹری تعمیرات و مواصلات،چیئرمین پنجاب انفارمیشن ٹیکنالوجی بورڈ،چیف ایگزیکٹو آفیسر انفراسٹرکچر ڈویلپمنٹ اتھارٹی پنجاب اور متعلقہ حکام سمیت صوبائی وزیرسپیشلائزڈ ہیلتھ کیئر اینڈ میڈیکل ایجوکیشن ڈاکٹر جاوید اکرم نے ویڈیولنک کے ذریعے اجلاس میں شرکت کی۔
