لاہور، 10 جولائی(اے پی پی): صوبائی وزیر صنعت و تجارت چوہدری شافع حسین سے گلوبل ٹریڈ ایکسپو سینٹر پاکستان کے چیئرمین مظہر حسین نے پیسک ہاؤس لاہور میں ملاقات کی۔ ملاقات میں پنجاب کے صنعتی مراکز میں سرمایہ کاری کے فروغ اور بین الاقوامی تجارتی مواقع پر تبادلہ خیال کیا گیا۔ چیئرمین مظہرحسین نے صوبائی وزیر کو ستمبر میں پیرس میں منعقد ہونے والے انویسٹمنٹ بزنس فورم میں شرکت کی دعوت دی اور ادارے کی جانب سے جاری معاشی سرگرمیوں کے فروغ کے اقدامات سے آگاہ کیا۔ اس موقع پر گفتگو کرتے ہوئے صوبائی وزیر چوہدری شافع حسین نے کہا کہ حکومت پنجاب کی مثبت پالیسیوں کے نتیجے میں صنعتی شعبے میں تیزی آئی ہے اور نئے کارخانے قائم ہونے سے مقامی سطح پر روزگار کے مواقع پیدا ہو رہے ہیں۔ انہوں نے کہا کہ سپیشل اکنامک زونز میں سرمایہ کاروں کو دس سالہ انکم ٹیکس چھوٹ اور ایک مرتبہ ڈیوٹی فری مشینری درآمد کرنے کی سہولت حاصل ہے، جو سرمایہ کاروں کے اعتماد میں اضافے کا سبب بن رہی ہے۔ چوہدری شافع حسین نے بتایا کہ چین،جاپان سمیت دیگر بین الاقوامی کمپنیاں پنجاب میں ای وی اور دیگر صنعتی شعبوں میں سرمایہ کاری کر رہی ہیں جبکہ یورپی سرمایہ کاروں کے لیے بھی پنجاب میں بہترین مواقع موجود ہیں۔ انہوں نے کہا کہ قائداعظم بزنس پارک شیخوپورہ میں گارمنٹ سٹی اور فارماسیوٹیکل ویلی قائم کیے جا رہے ہیں جبکہ سیالکوٹ میں 740 ایکڑ رقبے پر سرجیکل سٹی بنایا جائے گا۔ چوہدری شافع حسین نے اس عزم کا اظہار کیا کہ پنجاب میں سرمایہ کاری کے فروغ کے لیے ہر ممکن اقدام اٹھایا جا رہا ہے اور سرمایہ کاروں کو سازگار ماحول فراہم کیا گیا ہے۔ انہوں نے یہ بھی اعلان کیا کہ محکمہ صنعت و تجارت اور گلوبل ٹریڈ ایکسپو سینٹر پاکستان کے مابین سرمایہ کاری کے فروغ کے لیے جلد باہمی تعاون کا معاہدہ کیا جائے گا۔ ملاقات میں پنجاب سرمایہ کاری بورڈ کے ڈائریکٹر ڈاکٹرعمران ہاشمی، گلوبل ٹریڈ ایکسپو سینٹر کے ڈائریکٹرانٹرنیشنل ٹریڈ لیاقت علی اور دیگر افسران بھی شریک تھے۔
