قصور،27 اکتوبر (اے پی پی): ریسکیو 1122 قصور کے افسران اور اہلکاروں نے ضلعی انتظامیہ کی قیادت میں کشمیریوں سے اظہارِ یکجہتی اور ان کے حقِ خودارادیت کی جدوجہد کی حمایت کے لیے ‘یومِ سیاہ’ منایا، جس کے سلسلے میں ایک عظیم الشان ریلی کا انعقاد کیا گیا۔
ڈسٹرکٹ ایمرجنسی آفیسر ڈاکٹر نئیر عالم خان کی ہدایت پر ریسکیو 1122 کے افسران اور اہلکاروں نے ڈپٹی کمشنر آفس قصور سے نکالی جانے والی ریلی میں شرکت کی۔ ریلی میں مختلف سرکاری محکموں کے نمائندوں، سول سوسائٹی کے اراکین، طلباء، اساتذہ اور زندگی کے دیگر شعبوں سے تعلق رکھنے والے افراد نے بڑی تعداد میں حصہ لیا۔
ریلی کے شرکاء نے آزاد کشمیر کے پرچم اور بینرز اٹھا رکھے تھے جن پر بھارتی مظالم کے خلاف نعرے درج تھے۔ اس موقع پر شرکاء نے 27 اکتوبر 1947ء میں جموں و کشمیر میں ہندوستانی افواج کے غاصبانہ ورود اور کنٹرول کی شدید مذمت کرتے ہوئے کشمیری عوام کے حق میں فلک شگاف نعرے لگائے۔
شرکاء نے یومِ سیاہ کے موقع پر کشمیری عوام کے ساتھ کامل یکجہتی کا اظہار کیا، ان کے حقوق کے لیے آواز بلند کرنے کے عزم کا اعادہ کیا اور بھارتی تسلط کے خلاف مسلسل جدوجہد پر مقبوضہ کشمیر کے عوام کو خراجِ تحسین پیش کیا۔ تقریب کے اختتام پر مقبوضہ جموں و کشمیر کے عوام، بالخصوص مظلوم مسلمانوں کی آزادی اور سلامتی کے لیے خصوصی دعا کی گئی۔
