بہاولنگر،27اکتوبر(اے پی پی): یوم سیاہ کشمیر کے موقع پر ضلعی انتظامیہ کی جانب سے احتجاجی ریلی نکالی گئی، ریلی کے آغاز پر 2 منٹ کی خاموشی اختیار کی گئی جبکہ ٹریفک کا سلسلہ بھ رکا رہا اور قومی ترانہ بجایا گیا۔
ریلی کی قیادت ڈپٹی کمشنر کیپٹن(ر) محمد وسیم اور ڈی پی او ظفر بزدار نے کی ریلی میں سول سوسائٹی اور سرکاری ملازمین کی بھرپور شرکت کی۔ ریلی کے شرکاء نے بازوں پر سیاہ پٹیاں، ہاتھوں میں مذمتی بینررز اٹھا رکھے تھے۔ مظاہرین نے کشمیریوں کے حق میں زبردست نعرے بازی کرتے ہوئے بلدیہ گیٹ سے سٹی سکول تک مارچ کیا۔ تقریب میں ڈپٹی کمشنر، اسسٹنٹ کمشنر سمیت دیگر افسران نے شرکت کی۔
بعد ازاں سٹی سکول ہال میں تقریب کا انعقاد کیا گیا۔ تقریب میں طلباء و طالبات نے کشمیر میں بھارتی مظالم پرڈاکومنٹری ، ٹیبلو پیش کئے۔
اس موقع پر خطاب کرتے ہوئے ڈپٹی کمشنر کیپٹن(ر) محمد وسیم اور ڈی پی او ظفر بزدار نے کہا کہ کشمیریوں پر جاری بدترین ظلم و ستم پر اقوام عالم بے حسی کا شکار ہیں، مظلوم کشمیری مسلمانوں کو اقوام متحدہ کی قراردادوں کے مطابق انکا حق دیا جائے۔ انہوں نے کہا کہ کشمیریوں کی آزادی کےلئے پاکستانی قوم کسی قربانی سے دریغ نہیں کرے گی۔
