اوکاڑہ،14اگست(اے پی پی):پاکستان کی 75 ویں یوم آزادی پر نیشنل ہائی ویز اینڈ موٹر وے پولیس بابو صابو کمپلیکس میں پروقار تقریب کا انعقاد کیا گیا۔ تقریب کا آغاز تلاوت قرآن پاک سے کیا گیا،کیک بھی کاٹا گیا۔سکول کے بچوں نے ملی نغموں، تقاریر کا مقابلہ، خاکے پیش کیے گئے جبکہ جیتنے والے بچوں میں انعامات تقسیم کیے گئے۔
تقریب کے شرکاء سے خطاب کرتے ہوئے ایڈیشنل آئی جی ڈاکٹر عثمان انور کا کہنا تھا کہ وطن عزیز کی ترقی کے لئے ہم سب کو اپنا کردار ادا کرنا ہے، قومی شاہراہوں پر قانون کے یکساں نفاذکو یقینی بنائیں، آج کے دن ہم تجدید عہد کرتے ہیں کہ عوام کو شاہراہوں پر محفوظ سفر کی فراہمی یقینی بنائیں گے۔ انہوں نے کہا کہ عوام ٹریفک قوانین کی پابندی کریں، ٹریفک قوانین عوام کی حفاظت کےلیے بنائے جاتے ہیں جن کی پاسداری قومی فریضہ ہے۔
ایڈیشنل آئی جی ڈاکٹر عثمان انور نے کہا کہ موٹرسائیکل سوار ہیلمٹ کا استعمال لازمی کریں، تیز رفتاری جان لیوا ثابت ہوتی ہے، حد رفتار سے تجاوز نہ کریں۔ انہوں نے تقریب میں آئے شرکاء اور عوام سے اپیل کی کہ لین کی خلاف ورزی نہ کریں اور سیٹ بیلٹ کا استعمال کریں۔
تقریب کے شرکاء نے عہد کیا کہ وہ آئندہ ٹریفک قوانین کی پابندی لازمی کریں گے، بچوں نےوعدہ کیا کہ وہ اپنے والداوربھائیوں کو ہیلمٹ، سیٹ بیلٹ کی پابندی سے متعلق آگاہ کریں گے۔ مقبوضہ کشمیر کے نہتے کشمیری بہن بھائیوں کے ساتھ یکجہتی کا اظہار بھی کیا گیا۔
تقریب میں زونل کمانڈر سینٹرل زون اور بڑی تعداد میں فیلڈافسران نے شرکت کی۔ یوم آزادی کے موقع پر سینٹرل زون کے تمام بیٹ کیمپس اور سیکٹر آ فسز میں بھی تقریبات کا انعقاد کیا گیا۔ سینڑل زون کیجانب سے قومی شاہراہ پر واکس اور ریلیاں نکالی گئیں۔
