میرپورخاص،26 نومبر( اے پی پی):ثانوی واعلیٰ ثانوی تعلیمی بورڈ میرپورخاص کے ناظم امتحانات غلام احمد آرائیں نے بارہویں جماعت کے (جنرل سائنس/میڈیکل و انجئینرنگ گروپس) کے سالانہ امتحانات سال برائے 2022 کے نتائج کا اعلان کردیا گیاہے۔ یہ نتائج تعلیمی بورڈ کی ویب سائٹ www.bisemirpurkhas.com پر دیکھے جاسکتے ہیں۔
تفصیلات کے مطابق بارہویں جماعت کے سالانہ امتحانات میں 16 ہزار 5 سو 21 طلبہ و طالبات نے حصہ لیا۔ نتائج کے مطابق پری انجینئرنگ میں پہلی پوزیشن گورنمنٹ بوائز ڈگری کالج عمرکوٹ کے طالب علم عابد عالم ولد محمد عالم سیٹ نمبر 28512 نے 1027 نمبر لے کر حاصل کی جبکہ دوسری پوزیشن گورنمنٹ بوائز ڈگری کالج بارہ میل کے طالب علم عبدالصمد ولد اکبر خان سیٹ نمبر 25176 نے 1026 نمبر لے کر حاصل کی جبکہ تیسری پوزیشن گورنمنٹ ڈگری کالج ڈیپلو کے طالب علم شاہدیو ولد رمیش سیٹ نمبر 29705 نے 1025 نمبر لے کر حاصل کی۔ پری انجینئر گروپ میں کامیابی کا تناسب 86.61 فیصد رہا، اسی طرح پری میڈیکل گروپ میں پہلی پوزیشن گورنمنٹ ہائر سیکنڈری اسکول نوکوٹ کے طالب علم آکاش کمار ولد اشوک کمار سیٹ نمبر 38609 نے 1029 نمبر لے کر حاصل کی جبکہ دوسری پوزیشن ابن رشد گورنمنٹ گرلز ڈگری کالج کی طالبہ پاریسہ سجاد بنت سجاد پرویز سیٹ نمبر 36138 نے 1028 نمبر لے کر حاصل کی جبکہ تیسری پوزیشن سندھ پبلک ہائر سیکنڈری اسکول عمرکوٹ کے طالب علم عطا محمد ولد سہراب خان سیٹ نمبر 43648 نے 1027 نمبر لے کر حاصل کی۔ پری میڈیکل گروپ میں کامیابی کا تناسب 90.32 فیصد رہا جبکہ سائنس جنرل گروپ میں 149 طلبہ اور طالبات نے حصہ لیا اور کامیابی کا تناسب 48.99 فیصد رہا۔ اس موقع پر چیئرمین تعلیمی بورڈ نے پوزیشن ہولڈرز طلبہ وطالبات میں اسناد اور پھولوں کے تحائف پیش کئے۔
تقریب میں طلبہ وطالبات کے علاوہ ان کے والدین، اساتذہ کرام اور تعلیمی بورڈ میرپورخاص کے سیکریٹری، ناظم امتحانات اور دیگر افسران بھی موجود تھے۔
