اسلام آباد،14دسمبر (اے پی پی):وفاقی وزیر برائے اقتصادی امور سردار ایاز صادق کی زیر صدارت قومی رابطہ کمیٹی برائے فارن فنڈڈ پراجیکٹس (این سی سی -ایف ایف پی ) کا اجلاس بدھ کو یہاں وزارت اقتصادی امور میں ہوا۔ اجلاس میں وزیر پلاننگ کمیشن آف پاکستان، وزیر مملکت برائے خزانہ، سیکرٹری اقتصادی امور ڈویژن، صوبائی حکومتوں کے ایڈیشنل چیف سیکرٹریز نے شرکت کی۔
اجلاس میں وزیر اعظم آفس، فنانس ڈویژن اور صوبائی پی اینڈ ڈی اور لائن ڈیپارٹمنٹس اور بورڈ آف ریونیو کے نمائندے بھی موجود تھے۔ اجلاس میں وزارت مواصلات، نیشنل ہائی وے اتھارٹی (این ایچ اے)، فنانس ڈویژن کے سینئر حکام نے بھی شرکت کی۔ اس فالو اپ میٹنگ میں، این سی سی -ایف ایف پی نے ٹرانسپورٹ اور کمیونیکیشن سیکٹر پر منعقدہ سابقہ میٹنگوں کی روشنی میں فورم کے فیصلوں کی تعمیل کی صورتحال کا جائزہ لیا۔
کمیٹی نے روڈ اور ٹرانسپورٹ سیکٹر کے 5.6 بلین امریکی ڈالر کے 12 جاری منصوبوں پر تبادلہ خیال کیا۔ ایشین ڈویلپمنٹ بنک،عالمی بینک، چین، سعودی فنڈ فار ڈویلپمنٹ (ایس ایف ڈی)، جاپان اور جنوبی کوریا کے ذریعے مالی اعانت فراہم کی گئی۔
وفاقی وزیر برائے اقتصادی امور سردار ایاز صادق نے اس سیکٹر میں غیر ملکی فنڈ سے چلنے والے منصوبوں کو آسانی سے نافذ کرنے کے لئے لائن وزارتوں اور محکموں کی کوششوں کو سراہا۔ یہ منصوبے علاقائی روابط کو بہتر بنانے اور افغانستان اور وسطی ایشیا کے ساتھ تجارت کو آسان بنانے کے لیے اہم ہیں۔انہوں نے لائن ڈپارٹمنٹس کو ہدایت کی کہ وہ پروجیکٹوں پر تیزی سے عملدرآمد کے لیے ٹائم لائنز پر سختی سے عمل کریں۔ انہوں نے اس بات پر زور دیا کہ ترقیاتی منصوبوں کو بروقت اور موثر انداز میں پایہ تکمیل تک پہنچایا جائے تاکہ لوگ بلا تاخیر ان منصوبوں سے مستفید ہو سکیں۔
